bp AÇG-də qazma qurğularının sayını 8-ə çatdırmağı planlaşdırır

bp şirkəti «Azəri-Çıraq-Günəşli» yataqlar blokunda qazma qurğularının ümumi sayını 8-ə çatdırmağı planlaşdırır. Bu barədə bp-nin Azərbaycan, Gürcüstan və Türkiyə regionunda geologiya və işlənmə üzrə vitse-prezidenti Dən Sparks «AÇG-də hasilata dəstək: Yeni yanaşmalar və texnologiyalar» mövzusunda məlumatlandırma sessiyasında danışıb.

Onun sözlərinə görə, «Azəri-Mərkəzi-Şərqi» platforması istismara verilib və bununla yataqdakı qazma qurğularının sayı 6-dan 7-yə yüksəlib. Səkkizinci qazma qurğusunun sualtı əməliyyatlar üçün cəlb edilməsi nəzərdə tutulur.

Dən Sparks qeyd edib ki, qazma qurğularından asılı olmayaraq quyularda müdaxiləyə imkan verən avadanlıqlar tətbiq olunur və bu işlərə ayrılan günlərin sayı xeyli artıb. Gəmilərdən və müstəqil texniki vasitələrdən istifadə etməklə də quyularda əməliyyatlar aparmaq mümkündür.

«Hər platformada bir qazma qurğusu olsa belə, əlavə iş imkanları sayəsində eyni vaxtda iki quyuda paralel fəaliyyət göstərə bilirik. Görülən tədbirlər və əlavə investisiyalar nəzərə alınanda, təqribən dörd il ərzində bir quyu üzərində iş günlərinin sayını 50 faiz artırmağa nail olmuşuq», – deyə o əlavə edib.