SOCAR və BP AÇG-da neftvermə əmsalını 40%-dən yuxarı qaldırmağı hədəfləyir

SOCAR və BP Azəri-Çıraq-Günəşli yatağında son neftvermə əmsalını 40%-dən yuxarı qaldırmağı hədəfləyir. Bunu SOCAR-ın vitse-prezidenti Babək Hüseynov deyib.

Onun sözlərinə görə, yataqda indiyədək milyardlarla barel neft hasil edilib və hələ də hasil edilə bilən milyardlarla barel ehtiyat qalır. Hüseynov AÇG-ı dünyanın ən qabaqcıl neft-qaz aktivlərindən biri adlandırıb, yatağın keçiriciliyi, məsaməliliyi və ölçüsünün qiymətləndirmədə fərq yaratdığını qeyd edib.

Vitse-prezident bildirib ki, yataq pik hasilat səviyyəsinə çatıb və bundan sonra təbii hasilatın azalması mərhələsinə keçib. SOCAR qarşısında duran əsas vəzifə bu aktivdən maksimum dəyərin necə əldə olunacağını müəyyənləşdirməkdir.

Hüseynov deyib ki, şirkət müstəqil təhlillər aparmaq yolunu seçməyib, operator BP ilə birlikdə çalışmağa qərar verib. Əsas sual yatağın son neftvermə əmsalının nə qədər ola biləcəyi olub. Müzakirələr nəticəsində tərəflər təxminən 40%-dən yuxarı göstəricinin mümkün olduğu qənaətinə gəlib.

O əlavə edib ki, bu nəticəyə neftin keyfiyyəti və infrastrukturun dərindən təhlili əsasında gəlinib. Hüseynovun sözlərinə görə, yataqda 40%-dən yüksək son neftvermə əmsalı dünya miqyasında ən yüksək göstəricilərdən biri sayılır. Hədəfə çatmaq üçün laylarda genişmiqyaslı seysmik tədqiqatlar aparılır.