SOCAR Türkiyədə polietilen və dizel istehsalını genişləndirir

SOCAR Türkiyədə neft-kimya və neft emalı sahələrinə investisiyalarını genişləndirməyi planlaşdırır. Şirkətin uzunmüddətli strategiyasına Əliağada yeni polietilen zavodunun tikintisi və mövcud istehsal müəssisələrinin modernləşdirilməsi daxildir. Bu layihələr SOCAR-ın Türkiyədəki təxminən 7 milyard dollarlıq neft-kimya investisiya proqramının əsas istiqamətlərindəndir.

Əliağa sənaye zonasında tikilməsi nəzərdə tutulan kompleksin illik istehsal gücü 850 min ton olacaq. Müəssisədə ABŞ texnologiyası — UNIPOL PE texnologiyası seçilib. Zavod Türkiyənin polietilen istehsalı potensialını artırmaqla yanaşı, idxaldan asılılığın azaldılmasına da töhfə verə bilər. Layihənin mühəndislik və hazırlıq işləri üçün 70 milyon dollar ayrılıb, bu mərhələnin 2027-ci ilin sonunadək tamamlanması planlaşdırılır.

Neft emalı istiqamətində də yeni addım var: STAR zavodunda təxminən 120 milyon dollar dəyərində Kero-Merox qurğusunun tikintisi nəzərdə tutulur. Qurğu istismara verildikdən sonra zavodun illik dizel yanacağı istehsalının 600 min ton artırılması hədəflənir. Layihənin 2029-cu ilin birinci rübündə tamamlanması planlaşdırılır.

SOCAR-ın Türkiyədəki fəaliyyəti neft emalı, neft-kimya, polimer istehsalı və sənaye infrastrukturu istiqamətlərini əhatə edir. Şirkət bu investisiyalarla Türkiyə bazarındakı mövqeyini möhkəmləndirməyi, iki ölkə arasında iqtisadi və sənaye əməkdaşlığını inkişaf etdirməyi hədəfləyir.