bp: «Şəfəq» layihəsində 444 yerli işçi çalışır

bp şirkətinin hesabatına görə, 2026-cı ilin üçüncü rübündə Cəbrayıl rayonunda yerləşən «Şəfəq» Günəş layihəsi üzrə tikinti işləri plana uyğun irəliləyib. Fotovoltaik modullar, payalar və struktur komponentləri daxil olmaqla əsas avadanlıqların təchizatı və çatdırılması tamamlanıb.

Payaların və izləyici sistemlərin quraşdırılmasında da irəliləyiş var: bu avadanlıqların təxminən 50 faizi artıq quraşdırılıb. Layihə əməyin təhlükəsizliyi üzrə göstəricilərini də qoruyur — xəsarət qeydə alınmadan 1 milyon iş saatı yerinə yetirilib.

Tikintidə yerli resursların payı artır. Hazırda layihəyə 444 yerli işçi cəlb olunub, onların 150-si işğaldan azad olunmuş ərazilərdə yeni məskunlaşan sakinlərdir. Tikintinin pik dövründə layihədə 700-dən çox iş yerinin yaradılacağı planlaşdırılır, artan işçi qüvvəsinin yerləşdirilməsi üçün sahədəki yaşayış blokları genişləndirilir.

Tikinti işlərinin 2027-ci ilin ortalarına qədər davam edəcəyi nəzərdə tutulub.