İstifadə şərtləri · AZERBUSINESS

Qüvvəyə minmə tarixi: 29 oktyabr 2026 · Son yenilənmə: 1 noyabr 2026

Bu İstifadə şərtləri (bundan sonra — «Şərtlər») azerbusiness.az saytının (bundan sonra — «Sayt») və orada satılan onlayn kursların istifadəsi qaydalarını müəyyən edir. Saytın sahibi və operatoru «AZERBUSINESS ONLINE» MMC, VÖEN 1506247841 (bundan sonra — «AZERBUSINESS», «Biz»). Sayta daxil olmaqla, qeydiyyatdan keçməklə və ya kurs almaqla siz bu Şərtləri, Geri qaytarma qaydalarını və Məxfilik siyasətini qəbul etmiş olursunuz. Şərtlərlə razı deyilsinizsə, Saytdan istifadə etməyin.

1. Anlayışlar

İstifadəçi — Sayta daxil olan istənilən şəxs.
Üzv — qeydiyyatdan keçib e-poçt ünvanını təsdiqləmiş İstifadəçi.
Alıcı (İştirakçı) — kursun ödənişini etmiş şəxs.
Kurs — Saytda satılan, əvvəlcədən yazılmış video dərslərdən ibarət rəqəmsal təhsil proqramı.
Məzmun — Saytda dərc olunan xəbər, təhlil, biznes ideyası, layihə materialları, mətn, şəkil, qrafik və videolar.

2. Saytın məzmunu: mənbələr və məlumat xarakteri

2.1. Xəbərlər və Layihələr necə hazırlanır

Xəbərlər və Layihələr bölmələrindəki materiallar AZERBUSINESS redaksiyası tərəfindən dünya və yerli bazarları izləməklə hazırlanır. Mənbələr: beynəlxalq və yerli media, rəsmi dövlət qurumları və mərkəzi banklar, şirkətlərin açıqlamaları və hesabatları, birja və bazar məlumatları, startap və investisiya platformaları (məsələn, Y Combinator, TrustMRR) və digər açıq mənbələr.
Əsas mənbələr materialın sonunda «Mənbələr» bölməsində göstərilir. Redaksiya məlumatı yoxlamağa və dəqiq çatdırmağa çalışır, lakin üçüncü tərəf mənbələrdəki məlumatın (o cümlədən şirkətlərin gəlir, MRR, investisiya və istifadəçi sayı göstəricilərinin) tam dəqiqliyinə və aktuallığına zəmanət vermir.
Layihələr bölməsində startaplar haqqında materiallar həmin şirkətlərin reklamı, tövsiyəsi və ya onlara investisiya çağırışı deyil; AZERBUSINESS-in bu şirkətlərlə əlaqəsi yoxdur, əgər materialda başqa cür göstərilməyibsə.
Materialda səhv aşkar etsəniz, support@azerbusiness.az ünvanına yazın — yoxlayıb düzəliş edirik.

2.2. Biznes ideyaları və Təhlil — məlumat xarakterlidir

Biznes ideyaları və Təhlil bölmələrindəki materiallar ümumi informasiya və maarifləndirmə məqsədi daşıyır, redaksiyanın araşdırmasına, açıq mənbələrə və praktik təcrübəyə əsaslanır.
İdeya kartlarında göstərilən başlanğıc kapitalı, geri qaytarma müddəti, çətinlik, gəlir və digər rəqəmlər təxminidir; real nəticə bazardan, yerdən, vaxtdan, sizin təcrübənizdən və icradan asılı olaraq əhəmiyyətli dərəcədə fərqlənə bilər.
Heç bir biznes ideyası, təhlil, keys və ya layihə nümunəsi 100% nəticəyə, gəlirə və ya uğura zəmanət vermir. Materiallara əsaslanan qərarı (biznes açmaq, investisiya qoymaq, alqı-satqı etmək) İstifadəçi öz araşdırması əsasında, öz riski ilə verir və nəticələrinə görə məsuliyyəti özü daşıyır.

2.3. Məsləhət deyil

Məzmun investisiya, maliyyə, vergi və ya hüquqi məsləhət deyil. Kriptovalyuta, birja, valyuta və digər aktivlər üzrə materiallar alqı-satqı tövsiyəsi sayılmır. Zəruri hallarda lisenziyalı mütəxəssisə müraciət etmək tövsiyə olunur.
Qiymət lentindəki məlumatlar (qızıl, gümüş, neft, qaz, kriptovalyuta) üçüncü tərəf mənbələrdən gecikmə ilə alınır və yalnız məlumat üçündür; manat məzənnələri Azərbaycan Respublikası Mərkəzi Bankının rəsmi bülletenindəndir.
Biz məzmunun dəqiq və aktual olmasına çalışırıq, lakin hər bir məlumatın tam və səhvsiz olmasına zəmanət vermirik. AZERBUSINESS materiallara əsaslanan qərarlar nəticəsində yaranan itki və ya zərərə görə məsuliyyət daşımır.

3. Qeydiyyat və hesab

Qeydiyyat üçün düzgün ad və işlək e-poçt ünvanı tələb olunur; hesab e-poçt təsdiqindən sonra tam aktivləşir.
«Biznes ideyaları» və «Layihələr» bölmələrində son materiallar hamıya açıqdır; qalan materiallar yalnız təsdiqlənmiş Üzvlər üçündür.
Hesabın təhlükəsizliyinə (şifrənin gizli saxlanmasına) İstifadəçi özü cavabdehdir. Hesabınızdan icazəsiz istifadə şübhəsi yaranarsa, dərhal bizə yazın.
Hesab yalnız bir şəxs üçündür; hesabı başqasına vermək, satmaq və ya ortaq istifadə etmək qadağandır.
İstifadəçi hesabını istənilən vaxt «Hesabım → Profil» bölməsində silə bilər.
Kursları 18 yaşdan kiçik şəxslər yalnız valideynin (qanuni nümayəndənin) razılığı ilə ala bilər.

4. Kurslar: alış, ödəniş və çatdırılma

Kursun məzmunu, formatı və qiyməti kurs səhifəsində göstərilir. Qiymətlər Azərbaycan manatı (AZN) ilədir.
Ödəniş bank kartı ilə Epoint ödəniş sistemi vasitəsilə həyata keçirilir. Kart məlumatlarınız Saytda daxil edilmir və saxlanılmır — onlar birbaşa ödəniş sisteminin təhlükəsiz səhifəsində emal olunur.
Kurs əvvəlcədən yazılmış video dərslərdən ibarətdir. Dərslərə yalnız Saytda, hesabın «Kurslarım» bölməsindən baxılır; videolar yüklənmir, fayl və ya yükləmə linki kimi göndərilmir.
Ödəniş təsdiqləndiyi anda kursa giriş açılır, sifarişdə göstərilən e-poçt ünvanı ilə hesab yaradılır (hesab varsa, sifariş ona bağlanır) və həmin ünvana PDF qəbz göndərilir. Düzgün e-poçt ünvanı göstərmək Alıcının məsuliyyətidir.
Qəbz məktubunda kursdan məqsədinizi soruşuruq. Cavab yazsanız, dərslərin siyahısı seçiminizə uyğun sıra ilə göndərilir; cavab yazmasanız, siyahı 1 saat sonra standart sıra ilə gəlir. Cavab yazmaq məcburi deyil və kursa girişə təsir etmir.
Dərsə daxil olmaq üçün e-poçtunuza birdəfəlik kod göndərilir. Dərs sessiyası 4 saat qüvvədədir, dərslər eyni anda bir cihazda açıqdır: başqa cihazdan daxil olduqda əvvəlki sessiya dayanır. Videolarda Alıcının e-poçtu və sifariş nömrəsi su nişanı kimi görünür.
Kursa giriş müddəti kurs səhifəsində göstərilir; göstərilməyibsə, giriş müddətsizdir.
Ödəniş etməklə Alıcı razılaşır ki, kursa giriş açıldığı andan ödənişin geri qaytarılması hüququ bitir (bax: Geri qaytarma qaydaları).
Promo kodlar yalnız göstərilən müddətdə, göstərilən kurs üçün və istifadə limiti daxilində keçərlidir; nağd pula çevrilmir.
Biz kursların qiymətini və tərkibini dəyişmək hüququnu saxlayırıq; dəyişiklik artıq ödənilmiş sifarişlərə təsir etmir.

5. Nəticəyə zəmanət yoxdur

Kurslarda təqdim olunan metodlar və iş formatları müəlliflərin öz praktik təcrübəsinə əsaslanan biliklərdir.
Kurs təhsil proqramıdır. Biz kursun bütün iştirakçılarının 100% nəticə əldə edəcəyinə, müəyyən gəlir qazanacağına, müəyyən müddətdə uğur əldə edəcəyinə və ya proqramda göstərilən metodları tətbiq edə biləcəyinə heç bir halda zəmanət vermirik. Nəticə hər bir şəxsin bilik və bacarığından, ayırdığı vaxtdan, səyindən, imkanlarından və bazar şəraitindən asılıdır; insanlar fərqlidir.
Kursda və ya Saytda göstərilən nümunələr, keyslər və rəqəmlər konkret şəxslərin təcrübəsidir və hər kəs üçün eyni nəticəni ifadə etmir.
Eyni qayda Saytdakı biznes ideyaları, təhlillər və layihə materiallarına da aiddir (bax: bölmə 2).

6. İştirakçının məsuliyyəti

Öyrəndiyi biliklərdən istifadə edib-etməmək barədə qərarı İştirakçı müstəqil verir və bu qərarın nəticələrinə görə məsuliyyəti özü daşıyır.
Bilikləri doğru, effektiv və məntiqli şəkildə, öz vəziyyətinə uyğunlaşdıraraq tətbiq etmək İştirakçının məsuliyyətidir. Göstərilən addımları kor-koranə köçürüb təkrarlamaq gözlənilən nəticəni təmin etmir.
İştirakçı biliklərin tətbiqi zamanı Azərbaycan Respublikasının qanunvericiliyinə (o cümlədən vergi, sahibkarlıq və istehlakçı hüquqlarına dair qaydalara) və istifadə etdiyi üçüncü tərəf platformalarının (YouTube, Amazon, birjalar və s.) qaydalarına riayət etməyə borcludur.
Biz İştirakçının biznes, investisiya və ya ticarət qərarları nəticəsində yaranan itki, ziyan və ya əldə olunmamış gəlirə görə məsuliyyət daşımırıq.

7. Əqli mülkiyyət və müəllif hüquqlarının qorunması

Saytdakı Məzmun, kurs videoları, dərs mətnləri, tapşırıqlar, şablonlar, metodikalar, AZERBUSINESS adı, loqosu və dizayn elementləri «Müəllif hüququ və əlaqəli hüquqlar haqqında» Azərbaycan Respublikasının Qanunu və digər qanunvericilik aktları ilə qorunan intellektual mülkiyyət obyektləridir və AZERBUSINESS-ə və ya müvafiq müəlliflərə məxsusdur.
Kursun alınması Alıcıya müəllif hüququnu keçirmir. Alıcıya yalnız kursu şəxsən, qeyri-kommersiya məqsədilə Saytda izləmək üçün başqasına verilməyən və satılmayan sadə (qeyri-müstəsna) istifadə hüququ verilir.
Bu Şərtlərlə, AZERBUSINESS-in yazılı icazəsi olmadan aşağıdakılar qəti qadağandır:
- videoları yükləmək, ekrandan yazmaq, su nişanını gizlətmək və ya silmək;
- kursu, onun dərslərini, videolarını, dərs linklərini və ya materiallarını hər hansı şəxsə satmaq, yenidən satmaq, pullu və ya pulsuz təklif etmək, icarəyə vermək, «ortaq alış» (bölüşdürülmüş ödəniş) təşkil etmək;
- materialların nüsxələrini başqalarına vermək, göndərmək, yaymaq, Telegram, WhatsApp, sosial şəbəkələr, bulud qovluqları, fayl paylaşma xidmətləri və digər saytlarda yerləşdirmək;
- kursun məzmununu öz adından, öz kursu, təlimi və ya məhsulu kimi təqdim etmək, onun əsasında törəmə kurs hazırlayıb satmaq;
- hesaba, birdəfəlik giriş kodlarına və dərslərə girişi başqası ilə bölüşmək.
Müəllif hüququnun pozulması, o cümlədən kurs materiallarının qeyri-qanuni satışı və yayılması Azərbaycan Respublikasının Mülki Məcəlləsi, İnzibati Xətalar Məcəlləsi və Cinayət Məcəlləsi ilə nəzərdə tutulmuş mülki, inzibati və ya cinayət məsuliyyətinə səbəb olur.
Pozuntu aşkar edildikdə AZERBUSINESS: (1) pozuntuya yol verən şəxsin kursa girişini ödəniş qaytarılmadan dərhal ləğv edir; (2) qeyri-qanuni yerləşdirilmiş materialların silinməsini tələb edir və platformalara müraciət edir; (3) vurulmuş zərərin, o cümlədən əldə olunmamış gəlirin ödənilməsi və qanunla nəzərdə tutulan kompensasiya tələbi ilə məhkəməyə müraciət edir; (4) zəruri hallarda hüquq-mühafizə orqanlarına müraciət edir.
Biz qeyri-qanuni yayılmış nüsxələrin mənbəyini müəyyən etmək üçün su nişanı daxil olmaqla qanunvericiliyə uyğun vasitələrdən istifadə etmək hüququnu saxlayırıq.
Kurs materiallarının icazəsiz satışı və ya yayılması barədə məlumatınız varsa, support@azerbusiness.az ünvanına yazın — məlumat verənin adı gizli saxlanılır.
Saytdakı xəbər və təhlil materiallarından istifadə zamanı azerbusiness.az-a aktiv keçidlə istinad mütləqdir; materialların tam köçürülməsi yalnız yazılı icazə ilə mümkündür.

8. Qadağan olunan hərəkətlər

Saytın işini pozmaq, təhlükəsizlik sistemlərindən yan keçmək, avtomatlaşdırılmış vasitələrlə məzmunu kütləvi toplamaq.
Bağlı (yalnız Üzvlər üçün) materialları icazəsiz əldə etməyə cəhd etmək.
Başqa şəxsin adından qeydiyyatdan keçmək, saxta məlumat vermək.
Saytı qanunsuz məqsədlər üçün istifadə etmək.

Bu qaydalar pozulduqda Biz hesabı xəbərdarlıq etmədən məhdudlaşdıra və ya bağlaya bilərik.

9. Reklam və üçüncü tərəf keçidləri

Saytda «Reklam» işarəsi ilə göstərilən materiallar reklamçıların məlumatıdır. Reklamçının məhsul və xidmətlərinə görə reklamçı özü məsuliyyət daşıyır.
Saytda üçüncü tərəf saytlarına keçidlər ola bilər; həmin saytların məzmununa və məxfilik qaydalarına görə Biz cavabdeh deyilik.

10. Məsuliyyətin məhdudlaşdırılması

Sayt «olduğu kimi» təqdim edilir. Biz Saytın fasiləsiz və xətasız işləyəcəyinə zəmanət vermirik; texniki işlər zamanı Sayt müvəqqəti əlçatmaz ola bilər.
Qanunvericiliklə yol verilən həddə, kurs üzrə hər hansı tələb üzrə məsuliyyətimiz həmin kurs üçün Alıcının ödədiyi məbləğlə məhdudlaşır.
Bu bölmə qanunla məhdudlaşdırılması qadağan olunan məsuliyyətə şamil edilmir.

11. Şərtlərin dəyişdirilməsi

Biz bu Şərtləri dəyişə bilərik. Yeni redaksiya Saytda dərc edildiyi andan qüvvəyə minir; əhəmiyyətli dəyişikliklər barədə Üzvlərə e-poçtla məlumat verilir. Artıq ödənilmiş sifarişlərə ödəniş anında qüvvədə olan şərtlər tətbiq edilir.

12. Mübahisələrin həlli

Bu Şərtlər Azərbaycan Respublikasının qanunvericiliyi ilə tənzimlənir. Mübahisələr əvvəlcə danışıqlar yolu ilə həll edilir: support@azerbusiness.az ünvanına yazılı müraciət edin, 10 (on) iş günü ərzində cavab veririk. Razılıq əldə olunmazsa, mübahisə Azərbaycan Respublikasının məhkəmələrində həll edilir.

13. Əlaqə

«AZERBUSINESS ONLINE» MMC · VÖEN: 1506247841 · E-poçt: support@azerbusiness.az