AÇG layihəsinə ilk 9 ayda 1 milyard 489 milyon dollar xərclənib

Bu ilin ilk üç rübündə «Azəri-Çıraq-Günəşli» yataqlar bloku (AÇG) üzrə fəaliyyətlərə təqribən 1 milyard 489 milyon dollar xərclənib. Bu rəqəm BP şirkətinin Azərbaycandakı fəaliyyətinə dair ilk 9 ayın yekunlarına həsr olunan hesabatında göstərilib.

Xərclərin 401 milyon dolları əməliyyat məsrəfləri, 1 milyard 88 milyon dolları isə əsaslı məsrəflərdir.

Hesabata görə, AÇG-də 4-ölçülü (4D) yüksək dəqiqlikli dənizdibi qovşaqlarla seysmik tədqiqat proqramı çərçivəsində 2025-ci ildə əldə olunan məlumatların interpretasiyası və inteqrasiyası üçüncü rübdə də davam edib. Eyni zamanda, 2027-ci ilin yanvarında başlaması planlaşdırılan üçüncü il üçün məlumat toplanmasına hazırlıq işləri gedib.

Dərinsulu Günəşli ərazisində çoxquyulu sualtı müdaxilə proqramı üçüncü rübdə təhlükəsiz və qrafiki qabaqlayaraq başa çatıb. Proqram çərçivəsində ənənəvi üsullarla müdaxilənin çətin sayıldığı 7 sualtı quyuda əməliyyatlar uğurla aparılıb.

Mərkəzi Azəri platformasında Mərkəzi Azəri Qaz Genişləndirilməsi (CAGE) layihəsi də üçüncü rübdə tamamlanıb. Nəticədə platformada qazın yenidən laylara vurulma gücü 20% artıb ki, bu da mövcud quyulardan neftverməni maksimuma çatdırmağa kömək edəcək.

Layihə çərçivəsində platformadakı dörd qazvurma kompressoru əsaslı modernləşdirilib. İşlər hasilatı dayandırmadan və məşəldə əlavə qaz yandırmadan görülüb. Kompressorun giriş xəttindəki kollektor boru sistemində modifikasiyalar da aparılıb. Bu modifikasiyalar avqust ayında Mərkəzi Azəri platformasında keçirilən profilaktik işlər proqramı zamanı yerinə yetirilib, ardınca layihə üzrə yekun işlər tamamlanıb.