Azad edilmiş ərazilərdə 91 layihə maliyyə ekspertizasından keçirilib

Bu ilin yanvar-sentyabr aylarında işğaldan azad edilmiş ərazilərdə 91 layihə maliyyə ekspertizasına cəlb olunub. Maliyyə Nazirliyinin məlumatına görə, ümumi dəyəri 1 milyard 38 milyon manat olan 59 layihə tamamlanıb, 32 layihə üzərində iş davam edir.

Ekspertiza “İşğaldan azad edilmiş ərazilərdə dövlət investisiya layihələrinin səmərəliliyinin artırılmasına dair Tədbirlər Planı” çərçivəsində aparılır. Nazirlik bildirir ki, məqsəd dövlət investisiya və infrastruktur layihələrini yüksək səmərəlilik və icra intizamı əsasında əlaqələndirmək, dövlət vəsaitindən qənaətlə istifadəni təmin etmək, layihələri optimallaşdırmaq və preventiv nəzarəti gücləndirməkdir.

Maliyyə ekspertizasının bir hissəsi qiymət yoxlamasıdır. Bu zaman malların, materialların və avadanlığın, həmçinin işçi qüvvəsi, maşın və mexanizmlərdən istifadə ilə bağlı xərclər qüvvədə olan normalar və orta bazar qiymətləri ilə müqayisə edilir, fərqlər müəyyənləşdirilir.

Digər hissə iş həcmlərinin ekspertizasıdır: layihə cizgiləri ilə smeta sənədləri arasında miqdar və hesablama uyğunsuzluqları, Azərbaycan Respublikası Prezidenti Administrasiyasının “İşğaldan azad olunmuş ərazilərdə yaşayış məntəqələrinin layihələndirilməsinə dair Tövsiyələr”i əsas götürülməklə kənarlaşmalar təsbit edilir.