Maliyyə Nazirliyi: 2027-ci ildə güzəşt və azadolmaların məbləği 7.6 milyard manata çatacaq

Maliyyə Nazirliyi 2027-ci ildə vergi və gömrük güzəşt və azadolmalarının məbləğini 7.6 milyard manat, proqnozlaşdırılan ÜDM-in 5.4%-i həcmində qiymətləndirir. Bu barədə nazirliyin Aparat rəhbərinin müavini Asif Qasımov Milli Məclisin İqtisadi siyasət, sənaye və sahibkarlıq komitəsinin iclasında danışıb.

Onun sözlərinə görə, bu, cari ilin sonuna gözlənilən azadolmaların məbləğindən 630 milyon manat və ya 0.4 faiz bəndi çoxdur. Qasımov müqayisə üçün deyib ki, Gürcüstanda güzəştlər ÜDM-in 4.6%-i, Türkiyədə 4.5%-i, OECD ölkələrində 4.7%-i həcmindədir.

Büdcə gəlirlərini təmin edən orqanlar üzrə bölgüdə vergi daxilolmaları üzrə 4.2 milyard manat, yaxud cari illə müqayisədə 9% çox, idxal əməliyyatları üzrə 3.4 milyard manat, yaxud 11% çox güzəşt və azadolma var. İqtisadi sektorlar üzrə neft sektoru 436 milyon manat, qeyri-neft sektoru 7.1 milyard manat təşkil edir; hər iki komponentdə cari illə müqayisədə 9% artım proqnozlaşdırılır.

Qasımov əlavə edib ki, 7.6 milyard manatın 4.4 milyard manatı «güzəşt», 3.2 milyard manatı «azadolma» meyarına uyğun gəlir.