Kənd təsərrüfatı nazirliyinin agentliyi heyvandarlıq subsidiyalarının şərtlərini açıqladı

İntensiv heyvandarlıq təsərrüfatlarında doğulmuş və ya ən azı 6 ay orada kökəldilmiş, diri çəkisi 600 kiloqram və daha çox olan iribuynuzlu heyvanlardan alınan mal ətinin tədarükçüyə təhvil verilmiş hər kiloqramına görə 0.4 manat məhsul subsidiyası verilir. Kənd Təsərrüfatı Nazirliyi yanında Aqrar Kredit və İnkişaf Agentliyinin (AKİA) AZƏRTAC-a bildirdiyinə görə, məsələn, 600 kiloqram mal ətinin müqabilində fermer 240 manat alır.

Dəri və yun xammalının yerli emal müəssisələrinə təhvil verilməsi də subsidiyalaşdırılır. İribuynuzlu heyvan dərisinin hər ədədinə 3 manat, xırdabuynuzlu heyvan dərisinin hər ədədinə 0.30 manat, yunun hər kiloqramına 0.3 manat ödənilir.

Subsidiyadan yararlanmaq üçün fermer «Elektron kənd təsərrüfatı» informasiya sistemində (EKTİS, www.eagro.az) qeydiyyatdan keçməli, mal ətinin, dərinin və yunun tədarükçüyə və ya emal müəssisəsinə təhvil verilməsi barədə elektron qaimə-fakturaları və ya elektron alış aktlarını sistemə daxil etməlidir. Tədarükçülər də təhvil aldıqları məhsulun növü və miqdarı haqqında məlumatları EKTİS-ə yazmalıdır.

AKİA sənədləri digər mənbələrdən gələn məlumatlarla üzləşdirdikdən sonra uyğun statuslu müraciətlər üzrə ödənişi edir. Dəri və yun lisenziyalı yerli emal müəssisələrində və ya onların regionlardakı qəbul-tədarük məntəqələrində qəbul olunur. Xammal emala yararlı, təmiz və gigiyena standartlarına uyğun olmalıdır.

Yeni mexanizmlər Aqrar Subsidiya Şurası təsdiqləyib. Subsidiyanın tətbiqi üçün heyvanın ölkədə doğulması və ya ən azı 6 ay burada kökəldilməsi, identifikasiyası, sığortası və qeydiyyatda olan kəsimxanada kəsilməsi tələb olunur.