Büdcədən 10 ayda 296.7 milyon manat ƏDV və vergi geri qaytarılıb

2026-cı ilin yanvar-oktyabr aylarında dövlət büdcəsindən fiziki və hüquqi şəxslərə 296 milyon 715.3 min manat vəsait geri qaytarılıb. Bu barədə Maliyyə Nazirliyinin məlumatına istinadən məlum olub.

Geri qaytarılan məbləğin əsas hissəsi fiziki şəxslərin pərakəndə ticarət və ictimai iaşə sahəsində aldıqları mallara, mədəniyyət (teatr, kino, muzey, konsert) və tibbi xidmətlərə, həmçinin işğaldan azad edilmiş ərazilərdəki mehmanxana xidmətlərinə görə ödədikləri ƏDV-nin qaytarılmasıdır.

Həmin siyahıya əcnəbilərin ölkə ərazisində istehsal və kommersiya məqsədi daşımayan mal alarkən ödədikləri ƏDV də daxildir.

Bundan başqa, bina tikintisi fəaliyyəti ilə məşğul olan şəxslərdən nağdsız qaydada alınmış yaşayış və qeyri-yaşayış sahələrinə görə ödənilmiş ƏDV-nin bir hissəsi geri qaytarılıb. Artıq ödənilmiş digər vergilər, dövlət rüsumu, faizlər və maliyyə sanksiyaları da geri qaytarılan vəsaitlər sırasındadır.