Şarma: Beynəlxalq tərəfdaşlıq Azərbaycanın enerji ixracını genişləndirir

Enerji bazarı üzrə analitik, “Forbes” nəşrinin baş yazarı və müstəqil məsləhətçi Qaurav Şarma AZƏRTAC-a açıqlamasında deyib ki, Azərbaycanın enerji sektorunda yeni layihələr və beynəlxalq əməkdaşlıq ölkənin Avropa bazarındakı mövqeyini möhkəmləndirir. Onun sözlərinə görə, bu, ixrac üçün əlavə imkanlar yaradır.

Şarma Azərbaycanın enerji ixracı infrastrukturunun inkişafında Cənub Qaz Dəhlizi ilə yanaşı, Bakı-Tbilisi-Ceyhan boru kəmərinin də mühüm yer tutduğunu deyib. Analitikin fikrincə, bu marşrutlar ölkənin enerji resurslarının beynəlxalq bazarlara etibarlı çatdırılmasına şərait yaradır.

Onun diqqət çəkdiyi layihələrdən biri “Abşeron” layihəsinin ikinci mərhələsidir. Şarma bildirib ki, layihənin reallaşdırılması ölkənin təbii qaz təchizatında iştirak imkanlarını genişləndirə və Avropa istiqamətində ixrac potensialına əlavə töhfə verə bilər.

Analitik əlavə edib ki, beynəlxalq şirkətlərin investisiya və təcrübəsinin yerli enerji imkanları ilə birləşdirilməsi Azərbaycana mövcud infrastrukturdan daha səmərəli istifadə etməyə şərait yarada bilər. Onun sözlərinə görə, Azərbaycan investisiya imkanlarını genişləndirmək üçün yaxın regiondan, Cənubi Avropadan və digər ölkələrdən beynəlxalq tərəfdaşları bir araya gətirir.

Şarma qeyd edib ki, söhbət yalnız enerji nəqlindən getmir: nəqliyyat, logistika və digər əlaqəli sahələr də daxil olmaqla, bütün dəyər zənciri formalaşır. Onun fikrincə, Avropa gələcəkdə bu resurslara daha çox etibar edə bilər. Analitik Çexiya, Bolqarıstan, İsrail, Ermənistan, Gürcüstan və Türkiyənin, eləcə də digər ölkələrin bu əməkdaşlıqda iştirak etdiyini deyib. Onun sözlərinə görə, bütün bu prosesin mərkəzində Azərbaycanın milli enerji şirkəti SOCAR dayanır.