Nazir müavini: qeyri-neft-qaz sektoru ildə orta hesabla 5.2% artacaq

İqtisadiyyat nazirinin müavini Azər Bayramov 2022–2026-cı illərdə qeyri-neft-qaz sektorunun orta illik hesabla 5.2% artacağını deyib. O, bunu parlamentin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Regional məsələlər komitələrinin birgə iclasında bildirib.

Nazir müavini qeyd edib ki, bu hesablama 2026-cı ilin gözlənilən nəticələri nəzərə alınmaqla aparılıb. Onun sözlərinə görə, göstərici Strategiya ilə müəyyən edilmiş hədəfdən yüksəkdir.

Azər Bayramov qlobal iqtisadiyyatda qeyri-müəyyənliklərin davam etdiyi şəraitdə ölkədə makroiqtisadi sabitliyin qorunduğunu, iqtisadiyyatın şaxələndirildiyini və qeyri-neft-qaz sektorunun davamlı inkişaf etdiyini vurğulayıb. Onun fikrincə, iqtisadi artım da məhz bu sektorun hesabına təmin olunur.