Cəbrayıl və Zəngilanda kəndlər, içki zavodu və təhsil kompleksi açılıb

Zəfər Gününün altıncı ildönümü ərəfəsində Prezident İlham Əliyev və birinci xanım Mehriban Əliyeva Cəbrayıl və Zəngilan rayonlarına səfər edib. Səfər zamanı Cəbrayılın Soltanlı kəndi, «Sunbeverage» MMC-nin alkoqolsuz içki istehsalı müəssisəsi, Zəngilanın Cahangirbəyli kəndi və Zəngilan Şəhər Təhsil Kompleksi ilə bağlı açılış tədbirləri keçirilib.

İqtisadi İslahatların Təhlili və Kommunikasiya Mərkəzinin Monitorinq və qiymətləndirmə şöbəsinin baş məsləhətçisi Yusif Məmmədov AZƏRTAC-a deyib ki, Soltanlı və Cahangirbəyli kəndlərində birinci mərhələdə yaşayış evlərinin istifadəyə verilməsi Böyük Qayıdışa dair I Dövlət Proqramının icrası baxımından əhəmiyyət daşıyır. Onun sözlərinə görə, evlərin və zəruri infrastrukturun yaradılması sakinlərin doğma yurdlarına mərhələli qayıdışına, müasir yaşayış şəraiti ilə təmin olunmasına və kəndlərdə məskunlaşmanın formalaşmasına xidmət edir.

«Sunbeverage» MMC-nin müəssisəsi Qarabağ və Şərqi Zəngəzur iqtisadi rayonlarında qida sənayesinin inkişafı, istehsal potensialının genişləndirilməsi və yeni məşğulluq imkanları baxımından əhəmiyyətli sayılır. Müəssisədə 300 nəfərin daimi işlə təmin edilməsi qayıdan əhalinin məşğulluq imkanlarını artırır. Məhsulların daxili bazarla yanaşı, xarici bazarlara çıxarılmasının nəzərdə tutulması ölkənin ixrac potensialının genişləndirilməsinə töhfə verə bilər. Müəssisənin fəaliyyəti qablaşdırma, saxlama, daşınma və satış kimi əlaqəli xidmət sahələrinin inkişafı, yerli sahibkarların istehsal-təchizat zəncirində iştirak imkanlarının genişlənməsi üçün əlavə potensial yaradır.

Yusif Məmmədov Zəngilan Şəhər Təhsil Kompleksinin istifadəyə verilməsini regionda sosial infrastrukturun inkişafı və keyfiyyətli təhsilə çıxış imkanlarının genişləndirilməsi istiqamətində mühüm addım adlandırıb. Onun fikrincə, müasir təhsil infrastrukturunun formalaşdırılması qayıdan ailələrin daimi məskunlaşmasında xüsusi rol oynayır. Kompleks şagirdlərə təhsillərini yaşadıqları ərazidə davam etdirməyə, bilik və bacarıqlarını inkişaf etdirməyə imkan verəcək, uzunmüddətli çərçivədə regionun insan kapitalını gücləndirəcək.

Məmmədov bildirib ki, yaşayış məntəqələrinin bərpası və müasir infrastrukturun qurulması ilə yanaşı, özəl investisiyaların təşviqi, yeni iş yerlərinin yaradılması və sosial xidmətlərə çıxışın təmin edilməsi paralel aparılır. Bu tədbirlər Qarabağ və Şərqi Zəngəzurun iqtisadi potensialının reallaşdırılmasına, əhalinin məşğulluğunun və rifahının yüksəldilməsinə, qayıdan ailələrin dayanıqlı məskunlaşmasına xidmət edir.