Azərbaycan və Bolqarıstan Yaşıl Enerji Dəhlizi üzrə birgə müəssisə yaradılmasını müzakirə edib

Energetika naziri Pərviz Şahbazov Antalyada keçirilən COP31 çərçivəsində Bolqarıstanın energetika naziri İva Petrova ilə görüşüb. Energetika Nazirliyindən AZƏRTAC-a bildirilib ki, görüşdə “Azərbaycan-Gürcüstan-Türkiyə-Bolqarıstan” Yaşıl Enerji Dəhlizi layihəsinin inkişafı müzakirə olunub.

Tərəflər dəhliz üzrə birgə müəssisənin yaradılmasını və layihənin texniki-iqtisadi əsaslandırmasının hazırlanmasına başlanmasını nəzərdən keçiriblər. Qeyd olunub ki, layihə yeni bərpaolunan enerji güclərinin inkişafına və Azərbaycanda istehsal olunan elektrik enerjisinin Türkiyə və Avropa bazarlarına çatdırılmasına imkan yaradacaq. Görüşdə həmçinin Avropa şirkətlərinin layihələrdə iştirakı, maliyyələşdirmə və texnoloji əməkdaşlıq imkanları ətrafında fikir mübadiləsi aparılıb.

Həmin gün Pərviz Şahbazov Beynəlxalq Enerji Agentliyinin (IEA) icraçı direktoru Fatih Birol ilə də görüşüb. Görüşdə IEA-nın COP29 çərçivəsində enerji təşəbbüslərinin hazırlanmasına verdiyi dəstək yüksək qiymətləndirilib. Tərəflər elektrikləşmənin enerji keçidində artan rolunu, Azərbaycanla IEA arasında bu istiqamətdə əməkdaşlığı və əvvəlki birgə fəaliyyətin yeni prioritetlərə uyğunlaşdırılması imkanlarını müzakirə ediblər.

Görüşdə enerji təhlükəsizliyinin təmin olunmasında təbii qazın rolu və yaşıl enerji dəhlizlərinin elektrikləşmənin genişləndirilməsi üçün yaratdığı imkanlar diqqətə çatdırılıb. Azərbaycanın elektrikləşmə gündəliyi üzrə IEA ilə dialoqun və texniki əməkdaşlığın davam etdirilməsi məsələləri də nəzərdən keçirilib.