Nazir müavini: minimum əməkhaqqına yanaşma dəyişdirilməlidir

Əmək və əhalinin sosial müdafiəsi nazirinin müavini Zaur Əliyev Milli Məclisin Əmək və sosial siyasət komitəsinin iclasında minimum əməkhaqqına yanaşmanın dəyişdirilməsini təklif edib. Onun sözlərinə görə, əmək bazarında qısamüddətli müqavilələr, natamam iş vaxtı və bəzi sahələrdə çevik məşğulluq formaları var və bu, yanaşmanın təkmilləşdirilməsini zəruri edir.

Əmək Məcəlləsində və digər qanunlarda dəyişiklik edilməsini nəzərdə tutan qanun layihəsi bəzi fəaliyyət sahələrində bir aydan az müddətə bağlanan əmək müqavilələri, həmçinin həftəlik iş vaxtı 20 saat və ya daha az olan işlər üçün saatlıq əməkhaqqı tətbiqini nəzərdə tutur.

Nazir müavini bildirib ki, minimum saatlıq əməkhaqqının minimum aylıq əməkhaqqıdan hesablanan saatlıq tarif maaşından yüksək müəyyən edilməsi təklif olunur. Sistemin tətbiq olunacağı sahələri Nazirlər Kabineti müəyyən edəcək. İlkin mərhələdə kənd təsərrüfatı məhsullarının istehsalı və ictimai iaşə sahələrinin əhatə olunması nəzərdə tutulur.

Zaur Əliyev deyib ki, təklif olunan dəyişiklik minimum əməkhaqqının daha çevik tətbiqinə, əməkhaqqı hesablamalarında şəffaflığın artırılmasına və beynəlxalq təcrübədə istifadə olunan yanaşmaların ölkəmizdə tətbiqinə imkan yaradacaq.