SOCAR STAR zavodunda 120 milyon dollarlıq yeni qurğu tikəcək

Azərbaycan Dövlət Neft Şirkəti (SOCAR) Türkiyədəki STAR neft emalı zavodunda aviasiya kerosini istehsalı üçün yeni qurğunun tikintisinə təxminən 120 milyon ABŞ dolları (təqribən 6 milyard Türkiyə lirəsi) xərcləməyi planlaşdırır. Bu barədə Türkiyə mediası «SOCAR Türkiye» şirkətinə istinadən yazıb.

Zavod aviasiya yanacağı istehsalı üçün yeni qurğunun layihələndirilməsi, satınalınması və inşası mərhələsinə keçib. «SOCAR Türkiye»nin neft emalı və neft-kimya biznes bölməsinin rəhbəri, «Petkim Petrokimya Holding»in baş direktoru Kənan Mirzəyevin sözlərinə görə, bu kapital qoyuluşları çərçivəsində aviasiya yanacağının istehsalı yeni «Jet Fuel» («Kero-Merox») qurğusuna keçiriləcək. Eyni zamanda ildə təqribən 600 min ton əlavə dizel yanacağı istehsalı gücü yaranacaq. Mirzəyev bildirib ki, bu, bazar vəziyyətini nəzərə almaqla aviasiya kerosini və dizel istehsalını daha çevik idarə etməyə imkan verəcək.

Layihə zavodun əməliyyat çevikliyini və enerji səmərəliliyini artıracaq, Türkiyənin idxal olunan dizel yanacağından asılılığını azaldacaq. Hazırda STAR NEZ-də işləyən KHT qurğusu yeni «Jet Fuel» qurğusu işə salındıqdan sonra dizel istehsalına yönəldiləcək. Zərurət yarananda KHT aviasiya kerosini istehsalını bərpa edə biləcək.

Kənan Mirzəyevin məlumatına görə, layihə üzrə beynəlxalq şirkətlər konsorsiumu ilə EPC müqaviləsi bağlanıb. Layihə-axtarış, satınalma və tikinti-quraşdırma işlərinə yaxın günlərdə başlanacaq, yeni qurğunun 2029-cu ilin birinci rübündə işə salınması nəzərdə tutulur. Bu layihə SOCAR-ın Türkiyəyə yatırdığı ümumi investisiya həcmini 20 milyard dollara çatdıracaq.

2018-ci ildə istismara verilmiş STAR NEZ-in emal gücü ilkin 10 milyon tondan ildə 13 milyon tona qədər artıb. Nəticədə STAR Türkiyənin ən böyük vahid neft emalı zavoduna çevrilib.