Avtomobil bazarında median qiymət 19,500 manata çatıb

Azərbaycan Qiymətləndiricilər Palatasının (AQP) hesablamalarına görə, oktyabrda ölkənin avtomobil bazarında median qiymət 3.7% artaraq 19,500 manata çatıb. Palata bu yüksəlişi real bahalaşma ilə deyil, satışa çıxarılan nəqliyyat vasitələrinin tərkibinin dəyişməsi ilə izah edir. Elan sayı ay ərzində 7% azalaraq 37,531-ə düşüb, orta qiymət isə 1.9% artımla 30,089 manat olub.

Bazarda ucuz seqmentin payı azalıb: “LADA (VAZ)” elanlarının xüsusi çəkisi 9.4%-dən 8.8%-ə, “Kia”nın payı 7.5%-dən 5.7%-ə enib. Əvəzində “Mercedes”, “Hyundai”, “Toyota” və “BMW” kimi bahalı markaların payı artıb. AQP-nin fikrincə, ayrı-ayrı avtomobillər bahalaşmadan məhz bu dəyişiklik ümumi medianı yuxarı çəkib.

Bazarın tərkibinin təsirini ayırmaq üçün 2025-ci ilin dekabrı baza götürülməklə iki indeks hesablanıb. Bütün elanları izləyən dəyişən struktur indeksi ay ərzində 3.7% artaraq 112.7 bəndə çatıb. Ən çox təklif olunan 9 kütləvi marka-modelin qiymətini ölçən sabit struktur indeksi isə cəmi 0.4% artımla 104.2 bənd olub. Palata aradakı 3.3 faiz bəndi fərqi elan tərkibinin dəyişməsindən qaynaqlandığını bildirir.

Həm sentyabrda, həm də oktyabrda satışda qalan 7156 elanın 39.6%-də qiymət endirilib, yalnız 8.9%-də artırılıb, bu avtomobillər orta hesabla 1.5% ucuzlaşıb. Sabit səbətdə “Hyundai Sonata” 2.4% (23,750 manat), “Ford Fusion” 1.6% (18,500 manat), “Opel Astra” (9,400 manat) və “Ford Transit” (19,000 manat) 1.1%, “Hyundai Elantra” 0.5% (21,500 manat) bahalaşıb. “LADA (VAZ) 2107” 5,500 manatda qalıb, “Kia Sorento” 0.3% (34,800 manat), “Chevrolet Cruze” 0.7% (13,300 manat), “Hyundai Santa Fe” isə 1.4% (28,500 manat) ucuzlaşıb.

Təkliflərin 51.2%-i 20,000 manatdan, 22.9%-i 10,000 manatdan ucuzdur, 50,000 manatdan baha avtomobillərin payı 13%-dir. Median buraxılış ili 2013-cü il olsa da, median yürüş 3,000 kilometr azalaraq 190,000 kilometrə enib. Elanların 66.9%-i Bakının payına düşür, qalan hissəsi əsasən Sumqayıt (6.6%) və Gəncəyə (4.3%) aiddir. Yanacaq bölgüsündə benzin 66.7%, dizel 20.4%, hibrid və elektromobillər birlikdə 12.9% pay alır. Elektromobillər üzrə 496 elan qeydə alınıb, onların median qiyməti 50,750 manatdır.