AQP: Oktyabrda yeni tikili mənzillər bahalaşıb, köhnələrin qiyməti sabit qalıb

Azərbaycan Qiymətləndiricilər Palatasının oktyabr ayı üzrə hesablamalarına görə, yeni tikili mənzillərin satış qiyməti artmaqda davam edib. Bu seqmentdə median göstərici 2,888.9 manat/kvadratmetr, AQP indeksi isə 109.4 olub. Sentyabra nisbətdə indeks 1.4% yüksəlib, dekabr 2025-ci ilin baza dövrü ilə müqayisədə artım 9.4%-ə çatıb. Mənzillərin median ümumi satış təklifi 275 min manatdır.

Köhnə tikili mənzillərdə qiymətlər yerində sayıb. Median satış qiyməti 2,692.3 manat/kvadratmetr, indeks 106.8 səviyyəsindədir. Aylıq dəyişmə cəmi 0.04% olub ki, bu da qiymətlərin faktiki sabit qaldığını göstərir. Ötən ilin dekabrı ilə müqayisədə isə bu seqmentin qiymət səviyyəsi 6.8% yüksəkdir. Median ümumi satış təklifi 179 min manat təşkil edir.

Kirayə bazarında sentyabrdakı yüksəlişdən sonra müəyyən korreksiya baş verib. Yeni tikili mənzillərdə median aylıq kirayə 10.83 manat/kvadratmetr, köhnə tikililərdə 10.63 manat/kvadratmetrdir. Hər iki seqmentdə aylıq azalma 1.8%-dir. Yeni tikililərin kirayə indeksi 100.0-a enib, köhnə tikililərdə isə 106.3 olub — baza dövrü ilə müqayisədə 6.3% artım. Median aylıq kirayə haqqı yeni tikililərdə 1,000 manat, köhnələrdə 700 manatdır.

Palatanın məlumatına görə, torpaq bazarında bahalaşma, kommersiya obyektlərinin icarəsində nəzərəçarpan canlanma qeydə alınıb. Fərdi yaşayış evlərinin kirayəsində kəskin statistik geriləmə, qarajların satışı və icarəsində isə yüksək artım göstəriciləri var.