Vergi ödənişlərinin 92%-dən çoxu könüllü bəyan olunur

Dövlət büdcəsinə ödənilən vergilərin 92%-dən çoxu könüllü şəkildə bəyan olunur. Bunu Dövlət Vergi Xidmətinin rəis müavini Samirə Musayeva Bakıda keçirilən “Hüquq və uyğunluq” forumunda çıxış edərkən deyib.

Onun sözlərinə görə, bu nəticənin alınmasında vergi öhdəliklərinin icrasının sadələşdirilməsi, rəqəmsal xidmətlərin genişləndirilməsi və bəyannamələrin əvvəlcədən doldurularaq təqdim edilməsini nəzərdə tutan prefiling sisteminin tətbiqi mühüm rol oynayıb.

Forumda uyğunluq prinsiplərinin biznes mühitində formalaşdırılması, preventiv tədbirlərin görülməsi və transmilli şirkətlərin beynəlxalq uyğunluq standartlarına riayət etməsi də müzakirə olunub. Samirə Musayeva vurğulayıb ki, Azərbaycan beynəlxalq vergi əməkdaşlığının genişləndirilməsi və vergi şəffaflığının təmin edilməsi üçün İƏİT və G20-nin BEPS üzrə İnklüziv Çərçivəsinə, həmçinin vergi məsələləri üzrə qarşılıqlı inzibati yardım Konvensiyasına qoşulub.

Rəis müavini sahibkarlara potensial tərəfdaşlar barədə məlumat toplamağa imkan verən “Kontragentləri araşdır” elektron xidmətini də xatırladıb. Onun sözlərinə görə, bu xidmət biznesə dövlət dəstəyinin istiqamətlərindən biridir və könüllü vergi əməletməsinin yüksəlməsinə, bizneslə dövlət arasında etimadın möhkəmlənməsinə xidmət edir.

Musayeva əlavə edib ki, bizneslə dialoqun inkişafı sahibkarların təkliflərinin nəzərə alınmasına imkan verir, Vergi Məcəlləsinə edilən bəzi dəyişikliklər də biznes subyektlərindən gələn təkliflər əsasında hazırlanıb.