Taksi vergisi dəyişir: sabit 18 manat əvəzinə dövriyyədən 1%

Taksi xidmətlərində vergi modeli dəyişir. Dövlət Vergi Xidmətinin Vergi siyasəti baş idarəsinin rəisi Nicat İmanov bunu Milli Məclisin İqtisadi siyasət, sənaye və sahibkarlıq komitəsinin iclasında Vergi Məcəlləsinə təklif olunan dəyişikliklərin müzakirəsi zamanı deyib.

İmanovun sözlərinə görə, hazırda taksi fəaliyyəti fərqlənmə nişanının alınması ilə aparılır və qazancın az və ya çox olmasından asılı olmayaraq, sabit 18 manat vergi ödənilir. Təklif isə daha balanslı, gəlir əsaslı modeli nəzərdə tutur.

Yeni qaydada operatorlar ödəmə mənbəyində vergi tutacaq. Taksi fəaliyyəti göstərən şəxslərin inzibatçılıq yükü beləcə aradan qalxacaq. Onların dövriyyəsindən, yəni onlara çatacaq məbləğdən 1% vergi tutulacaq. Az dövriyyəsi olan sürücü daha az, yüksək dövriyyəsi olan isə 1% prinsipi ilə daha çox vergi ödəyəcək.

İmanov deyib ki, təhlillərə əsasən, orta məbləğ 18–20 manat ətrafında görünür. Bu məbləğdən daha az qazanc əldə edən vergi ödəyiciləri də var. Onun fikrincə, dəyişiklikdən daha az qazanc əldə edən vergi ödəyiciləri faydalanacaq.

Layihəyə əsasən, taksi sifarişi operatorları vasitəsilə ölkə ərazisində taksi ilə sərnişin daşımalarını edən vergi ödəyicilərinə operatorlar tərəfindən ödənilən gəlirlərdən 1% dərəcəsi ilə sadələşdirilmiş verginin hesablanması təklif olunur.