Qeyri-neft-qaz sektorundan vergi daxilolmaları proqnozu 297.4 milyon manat üstələyib

2026-cı ilin yanvar–oktyabr aylarında İqtisadiyyat Nazirliyi yanında Dövlət Vergi Xidmətinin xətti ilə dövlət büdcəsinə 16 milyard 65.2 milyon manat vergi daxil olub. Dövlət Vergi Xidmətinin məlumatına görə, bu, proqnozdan 1 milyard 274.2 milyon manat çoxdur.

Ötən ilin eyni dövrü ilə müqayisədə vergi daxilolmaları 1 milyard 686.8 milyon manat, yəni 11.7% artıb.

Qeyri-neft-qaz sektorundan daxilolmalar 11 milyard 776.4 milyon manat olub. Bu sektor üzrə büdcəyə proqnozdan əlavə 297.4 milyon manat ödənilib. 2025-ci ilin müvafiq dövrünə nisbətən qeyri-neft-qaz sektorundan vergi daxilolmaları 1 milyard 364.6 milyon manat və ya 13.1% artıb.

Hesabat dövründə məcburi dövlət sosial sığorta haqları üzrə daxilolmalar 5 milyard 672.8 milyon manat olub, proqnozdan əlavə 297.1 milyon manat ödənilib. Qeyri-büdcə təşkilatları üzrə daxilolmalar 3 milyard 838.5 milyon manatdan çoxdur.

İşsizlikdən sığorta haqları üzrə daxilolmalar 201.5 milyon manata yaxın olub, proqnozdan əlavə 8.3 milyon manat ödənilib. Qeyri-büdcə təşkilatları üzrə bu göstərici 156.5 milyon manatdır.

İcbari tibbi sığorta haqları üzrə daxilolmaların həcmi 849.3 milyon manatdan çox olub, proqnozdan əlavə 20.4 milyon manat ödənilib. Qeyri-büdcə təşkilatları üzrə daxilolmalar 570.9 milyon manata yaxındır.