Qeyri-neft-qaz ixracı 3.6 milyard dollara çatıb

Bu ilin yanvar-oktyabr aylarında Azərbaycanın qeyri-neft-qaz sektoru üzrə ixracının dəyəri ötən ilin eyni dövrü ilə müqayisədə 20.8% artaraq 3.6 milyard ABŞ dolları olub. Qeyri-monetar qızıl bu hesablamaya daxil deyil. İqtisadi İslahatların Təhlili və Kommunikasiya Mərkəzinin məlumatına görə, yalnız oktyabrda qeyri-neft-qaz ixracı bir il əvvələ nisbətən 23% çox — 414.2 milyon ABŞ dolları təşkil edib.

Oktyabr ayında yeyinti məhsulları üzrə ixracın dəyəri 115.2 milyon ABŞ dolları olub. Qeyri-yeyinti məhsulları üzrə ixrac isə qeyri-monetar qızıl istisna olmaqla 29.9% artaraq 280.7 milyon ABŞ dollarına çatıb.

Hesabat dövründə şəkər və şəkərdən hazırlanan qənnadı məmulatlarının ixrac dəyəri 2.4 dəfə (137.6%) artıb. Alüminium və ondan hazırlanan məmulatların ixracı 39.2%, qara metallardan məmulatların ixracı 34%, bitki və heyvan mənşəli piy-yağların ixracı 27.1%, mis və ondan hazırlanan məmulatların ixracı 24.9%, üzvi kimyəvi birləşmələrin ixracı 16.1%, pambıq lifinin ixracı 14.2%, tərəvəzlərin ixracı 11.6%, qəhvə və çayın ixracı 10.9%, yeməli meyvələrin ixracı isə 6.7% artıb.

İl ərzində aqrar məhsulların ixrac dəyəri 12.7% artaraq 866.9 milyon ABŞ dolları olub. Aqrar-sənaye məhsullarının ixracı 28.8% artaraq 334.9 milyon ABŞ dollarına çatıb. Aqrar və aqrar-sənaye məhsullarının birgə ixrac dəyəri isə 16.7% artaraq 1.2 milyard ABŞ dolları təşkil edib.