“BQ” birjada 1.36 milyon manatlıq istiqraz buraxır

“BQ” ASC Bakı Fond Birjasında 1.36 milyon manat dəyərində istiqraz satışına çıxır. Buraxılış 13,600 ədəd kağızdan ibarətdir, hər istiqrazın nominal dəyəri 100 manatdır.

Qiymətli kağızlar faizli, adlı, təminatsız və sənədsizdir. Onlar kütləvi təklif üsulu ilə yerləşdiriləcək və 7 il tədavüldə qalacaq. İstiqrazların illik gəlirliliyi 15%-dir, faizlər aylıq ödəniləcək.

Yerləşdirməyə “İnvest-Az İnvestisiya Şirkəti” QSC anderrayterlik edir. İstiqraz almaq istəyənlər Bakı Fond Birjasının üzvü olan digər investisiya şirkətlərinə də müraciət edə bilərlər. Emitent tədavül müddətində kağızları qarşılıqlı razılıq əsasında geri ala bilər.

“BQ”nin 100% səhmi Fərman Quliyevə məxsusdur. O, atası Eldar Quliyevlə birlikdə “Para” ASC bank olmayan kredit təşkilatının da səhmdarıdır.