Qeyri-neft ixracı oktyabrda 414.2 milyon dollara çatıb

Azərbaycanın qeyri-neft sektoru üzrə ixracı bu ilin yanvar-oktyabr aylarında 3.6 milyard dollara çatıb. İqtisadi İslahatların Təhlili və Kommunikasiya Mərkəzinin “İxrac icmalı”nın noyabr sayına görə, göstərici ötən ilin eyni dövrü ilə müqayisədə 20.8% çoxdur.

Oktyabr ayında qeyri-neft ixracı 414.2 milyon dollar olub və keçən ilin oktyabrından 23% yuxarıdır.

Hesabat dövründə yeyinti məhsullarının ixracı 115.2 milyon dollar dəyərindədir. Qeyri-yeyinti məhsulları üzrə ixrac 29.9% artımla 280.7 milyon dollara çatıb.

Yanvar-oktyabr aylarında şəkər və şəkərdən hazırlanan qənnadı məmulatlarının ixracı 2.4 dəfə (137.6%), alüminium və ondan hazırlanan məmulatların ixracı 39.2%, qara metallardan hazırlanan məmulatların ixracı 34%, bitki və heyvan mənşəli piylər və yağların ixracı 27.1%, mis və ondan hazırlanan məmulatların ixracı 24.9%, üzvi kimyəvi birləşmələrin ixracı 16.1%, pambığın ixracı 14.2%, tərəvəzlərin ixracı 11.6%, qəhvə və çayın ixracı 10.9%, yeməli meyvələrin ixracı 6.7% artıb.

Aqrar məhsullar üzrə ixrac 12.7% artaraq 866.9 milyon dollara, aqrar-sənaye məhsulları üzrə ixrac 28.8% artımla 334.9 milyon dollara yüksəlib. Aqrar və aqrar-sənaye məhsullarının ümumi ixracı 16.7% artaraq 1.2 milyard dollar olub.