Bakıda ilk beynəlxalq daşınmaz əmlak və investisiya sərgisi açılıb

Bakı Ekspo Mərkəzində Azərbaycanda ilk ixtisaslaşmış beynəlxalq daşınmaz əmlak və investisiya sərgisi — «AIREX 2026» keçirilib. Sərgidə müxtəlif ölkələrdən 70-dən çox yerli və beynəlxalq şirkət iştirak edib, ABB isə tədbirə tərəfdaşlıq dəstəyi verib. Bu barədə APA məlumat yayıb.

Sərgi mənzil almaq istəyən müştəriləri, daşınmaz əmlaka sərmayə qoymağı planlaşdıran investorları və sektorun peşəkarlarını bir araya gətirib. Ziyarətçilər yerli və beynəlxalq layihələrlə tanış olub, onların xüsusiyyətləri barədə ətraflı məlumat alıb, şirkət nümayəndələri ilə birbaşa ünsiyyət qurublar.

Tədbir daşınmaz əmlak bazarının iştirakçıları arasında peşəkar dialoqun inkişafı, təcrübə mübadiləsi və yeni əməkdaşlıq imkanlarının müzakirəsi üçün platforma rolunu oynayıb.

Ziyarətçilər daşınmaz əmlak sektorunun maliyyələşdirilməsi və ipoteka sahəsində lider mövqedə olan ABB-nin bu sahədə yaratdığı imkanlarla, dəstəklədiyi layihələrlə də yaxından tanış olublar.

«AIREX 2026» noyabrın 6-a qədər davam edib. Müzakirələrdə Azərbaycanın şəhərsalma perspektivləri, yeni inkişaf layihələri, brend rezidensiyalar, premium yaşayış layihələri, şəhər və məhəllələrin planlaşdırılması, dayanıqlı tikinti, həmçinin maliyyə və texnologiya şirkətlərinin daşınmaz əmlak sektoru ilə əməkdaşlıq imkanları yer alıb.