Qarabağda daşınmaz əmlak bazarı investorlar üçün açıqdır – Fond sədri

Azərbaycanda daşınmaz əmlak sahəsinə həsr olunmuş ilk beynəlxalq sərgi – AIREX 2026 keçirilir. Qarabağ Dirçəliş Fondunun İdarə Heyətinin sədri Rəhman Hacıyev sərgi çərçivəsində jurnalistlərə deyib ki, indiyədək ölkədə bu sahəni əhatə edən ayrıca ixtisaslaşmış sərgi olmayıb, bu baxımdan tədbirin təşkilini yüksək qiymətləndirir.

Onun sözlərinə görə, hazırda regionun ən böyük daşınmaz əmlak bazarı məhz Qarabağda formalaşır. İşğaldan azad edilmiş ərazilərdə onlarla kənd, yaşayış məntəqəsi və şəhər yenidən qurulur, genişmiqyaslı tikinti və abadlıq işləri aparılır. Fond sədri hesab edir ki, bu şəraitdə Qarabağın sərgidə təqdim olunması xüsusi əhəmiyyət daşıyır.

Rəhman Hacıyev AIREX 2026-nın ənənəvi xarakter almasını və gələcək illərdə daha geniş miqyasda təşkil olunmasını vacib sayır. Onun fikrincə, növbəti sərgilərdə Qarabağda yaradılan yeni şəhərlərin, yaşayış məntəqələrinin və daşınmaz əmlak layihələrinin daha geniş stendlərlə təqdim edilməsi mümkün olacaq.

Fond sədri bərpa və quruculuq prosesinə qoşulmaq istəyən yerli və xarici tikinti şirkətlərinin marağına da toxunub. O bildirib ki, şirkətlər artıq bölgəyə yalnız podratçı kimi deyil, investor qismində daxil olmaq imkanlarını da nəzərdən keçirirlər. Sərgidə iştirak edən bəzi şirkətlər Qarabağda kommersiya xarakterli layihələr artıq reallaşdırıb. Hacıyevin sözlərinə görə, belə tədbirlər bölgədə tikinti və daşınmaz əmlak bazarının inkişafına, yeni investisiyaların cəlb edilməsinə töhfə verəcək.