Azərbaycan Şanxayda idxal sərgisində 12 şirkətlə təmsil olunur

Şanxay şəhərində 9-cu Çin Beynəlxalq İdxal Sərgisi (CIIE 2026) keçirilir. Sərgini Çinin Ticarət Nazirliyi, Şanxay Xalq Hökuməti və Çin Beynəlxalq İdxal Sərgi Bürosu təşkil edib. Azərbaycan burada İqtisadiyyat Nazirliyinin təşkilatçılığı və ölkəmizin Çindəki Ticarət Nümayəndəliyinin dəstəyi ilə vahid ölkə və kommersiya stendləri ilə təmsil olunur.

İqtisadiyyat Nazirliyinin məlumatına görə, ölkə stendində Azərbaycanın iqtisadi inkişafı, turizm imkanları, biznes və investisiya mühiti barədə məlumat verilir. Ziyarətçilərə potensial investisiya layihələri və tematik videoçarxlar təqdim olunur. Stenddə həmçinin milli geyimlər, mətbəx və digər qeyri-maddi mədəni irs nümunələri nümayiş etdirilir.

“Made in Azerbaijan” stendində 12 şirkətin və “İstisu” mineral su zavodunun məhsulları yer alıb. Burada şərablar, digər alkoqollu və alkoqolsuz içkilər, qənnadı məhsulları, konservlər, un məmulatları və başqa ərzaq məhsulları göstərilir. Stend yerli şirkət nümayəndələri ilə xarici tərəfdaşlar arasında işgüzar müzakirələr üçün şərait yaradır.