Vüqar Oruc: Daşınmaz əmlak bazarı keyfiyyət və investisiya səmərəliliyi mərhələsinə keçir

Azərbaycan Qiymətləndiricilər Cəmiyyətinin (AQC) sədri, Türk Dövlətləri Qiymətləndiricilər Birlikləri Şurasının (CAATS) fəxri prezidenti Vüqar Oruc Fins.az-a deyib ki, ölkənin daşınmaz əmlak bazarı mənzil alqı-satqısı ilə məhdudlaşmır. Onun sözlərinə görə, bu bazar tikinti, maliyyə, bank, sığorta, şəhərsalma və qiymətləndirmə sektorlarına təsir göstərən geniş iqtisadi ekosistemin hissəsidir.

Ekspert bildirib ki, sektor investisiyaların cəlb olunması və iri maliyyə əməliyyatları ilə birbaşa bağlıdır. Azərbaycanda investisiya istiqamətlərindən biri məhz daşınmaz əmlakdır, tikinti və şəhərsalmanın prioritet sahələr sırasında olması isə bazarın əhəmiyyətini artırır.

V.Oruc qeyd edib ki, bazar kəmiyyət artımından keyfiyyət və investisiya səmərəliliyi mərhələsinə keçir. Əvvəl diqqət tikilən binaların sayına, mənzillərin satış həcminə və yeni layihələrin çoxalmasına yönəlirdisə, indi layihələrin keyfiyyəti, müasir şəhərsalma tələblərinə uyğunluğu, infrastruktur imkanları, təhlükəsizlik, sosial mühit, enerji səmərəliliyi və ekoloji prinsiplər ön plana çıxır. Onun fikrincə, müasir yaşayış mühiti nəqliyyat əlçatanlığı, sosial infrastruktur və komfort tələbləri ilə birlikdə qiymətləndirilməlidir.

AQC sədri AIREX 2026 – Birinci Azərbaycan Beynəlxalq Daşınmaz Əmlak Sərgisinin bazarın beynəlxalq səviyyədə tanıdılması, yeni investisiyaların cəlb edilməsi və sektor iştirakçıları arasında əməkdaşlığın genişləndirilməsi baxımından əhəmiyyət daşıdığını deyib. O, sərgidə Prezident İlham Əliyevin və birinci xanım Mehriban Əliyevanın iştirakını daşınmaz əmlak, tikinti və şəhərsalma sahələrinə dövlət səviyyəsində göstərilən diqqətin ifadəsi kimi qiymətləndirib.

Ekspert Bakının Baş Planı 2040 çərçivəsində nəzərdə tutulan şəhərsalma dəyişikliklərinin bazarın gələcək inkişafına təsir edəcəyini bildirib. İstismar müddətini başa vurmuş köhnə yaşayış fondunun yenilənməsi, yeni yaşayış binalarının inşası, parkların və yaşıllıq ərazilərinin salınması, abadlıq işləri paytaxtın şəhər mühitini dəyişir. Onun sözlərinə görə, bu proseslərdə Bakının tarixi və memarlıq xüsusiyyətləri qorunmalıdır.

V.Oruc daşınmaz əmlakın idarə edilməsi və qiymətləndirmə sahəsində peşəkarlığın artırılmasını da vacib sayır. Ali təhsil müəssisələrində bu istiqamətdə tədrisin təşkili ixtisaslı kadrlar hazırlaya bilər, əmlak brokerlərinin və digər bazar iştirakçılarının bilik səviyyəsinin yüksəldilməsi isə şəffaflığın və hesabatlılığın təmin edilməsinə xidmət edir.