Kirayə mənzil mexanizmində 11 minədək mənzil istifadəyə verilib

İpoteka və Kredit Zəmanət Fondunun kirayə mənzil mexanizmi çərçivəsində indiyədək 11 minədək mənzil vətəndaşların istifadəsinə verilib. Fondun İdarə Heyətinin sədr müavini Ramil Tahirov bildirib ki, həmin mənzillərin təxminən 30 faizi tikinti mərhələsində əldə olunub. Bu barədə o, “AIREX 2026” – Birinci Azərbaycan Beynəlxalq Daşınmaz Əmlak Sərgisi çərçivəsində keçirilən 3-cü Dayanıqlı Tikinti Sammitinin “Bünövrədən çıxarışa” panelində danışıb.

2019-cu ildən tətbiq edilən mexanizmdə fond həm mənzilləri alan, həm də onların maliyyələşdirilməsini aparan tərəf kimi çıxış edir. Tahirov deyib ki, bu səbəbdən risklərin idarə olunması üçün daha konkret prosedurlar müəyyənləşdirilib. Bakı və Sumqayıtda iki layihə çərçivəsində 1700 mənzil təminat qeydi əsasında əldə olunub, sonradan çıxarışla təmin edilərək vətəndaşlara verilib. Daha 1080 mənzil qabaqcadan qeydiyyat arayışı əsasında alınıb.

Fondun sədr müavini mexanizmin məqsədlərindən birini tikinti şirkətlərinin öhdəliklərini yerinə yetirməməsi ilə bağlı riskləri minimuma endirmək adlandırıb. Onun sözlərinə görə, mənzillərin alınması zamanı layihələrə dair texniki tələblər, developer şirkətlərin maliyyə dayanıqlılığı və tikinti mərhələlərinə uyğun ödəniş şərtləri əvvəlcədən müəyyən edilir. Tikinti layihələri üzrə ödənişlərin təmin edilməsi üçün bank qarantiyası formasında icra təminatından istifadə olunur. Tahirov əlavə edib ki, bu mexanizm bütün riskləri tam aradan qaldırmasa da, onların minimuma endirilməsinə imkan verir.

O, beynəlxalq təcrübədə tətbiq olunan eskrou modelinin də bu sahədə risklərin daha da azaldılmasına kömək edə biləcəyini qeyd edib. Tikinti mərhələsində mənzillərin alınması mexanizmlərinin genişləndirilməsi üçün hüquqi tənzimləmələrin təkmilləşdirilməsini, maliyyə təminatı vasitələrinin gücləndirilməsini və risklərin idarə olunması mexanizmlərinin inkişaf etdirilməsini vacib sayıb.