Azərbaycanda istehlak qiymətləri on ayda 5.6% artıb

2026-cı ilin yanvar-oktyabr aylarında istehlak qiymətləri 2025-ci ilin eyni dövrünə nisbətən 5.6% artıb. Dövlət Statistika Komitəsinin məlumatına görə, artım qida məhsulları, alkoqollu içkilər və tütün məmulatları üzrə 6.8%, qeyri-qida məhsulları üzrə 3.7%, əhaliyə göstərilən ödənişli xidmətlər üzrə 5.4% olub.

Oktyabr ayında istehlak qiymətləri sentyabra nisbətən 0.3%, 2025-ci ilin oktyabrına nisbətən isə 5.2% artıb. Qida məhsulları, alkoqollu içkilər və tütün məmulatları üzrə qiymətlər əvvəlki aya nisbətən 0.6%, əvvəlki ilin müvafiq ayına nisbətən 6.7% bahalaşıb.

Komitənin məlumatında oktyabrda ayrı-ayrı məhsullar üzrə qiymət dəyişmələri də göstərilib. Qarabaşaq yarması, mal və qoyun əti, toyuq əti və filesi, dondurulmuş balıq, yumurta, armud, xurma, brokkoli, xiyar, pomidor, şirin bibər, badımcan, yerkökü, baş soğan, kartof və kakao tozu bahalaşıb. Yumru düyü, makaron məmulatları, təzə balıq, limon, naringi, banan, alma, kivi, nar, üzüm, qoz, fındıq, şabalıd, ağ kələm, göyərti, balqabaq, göy lobya, süfrə çuğunduru, şəkər tozu və müxtəlif içli şokoladlı konfetlər isə ucuzlaşıb.

Qeyri-qida məhsulları üzrə qiymətlər oktyabrda əvvəlki aya nisbətən 0.2%, keçən ilin oktyabrına nisbətən 3.4% artıb. Kəsilmiş taxta, boya, parket üçün lak, mebel və led lampalar bahalaşıb, yuyucu vasitələr və zərgərlik məmulatları ucuzlaşıb.

Ödənişli xidmətlər üzrə qiymət artımı əvvəlki aya nisbətən 0.1%, əvvəlki ilin müvafiq ayına nisbətən 4.7% olub. Geyimlərin kimyəvi təmizlənməsi və ödənişli məktəbəqədər təhsil müəssisələrinin xidmətləri bahalaşıb, hava nəqliyyatı ilə beynəlxalq sərnişindaşıma xidmətləri ucuzlaşıb. Digər qida məhsulları, qeyri-qida məhsulları və ödənişli xidmətlərin qiymətlərində ciddi dəyişiklik olmayıb.