ABB-nin iki istiqraz buraxılışına 22 milyon manatdan çox sifariş daxil olub

ABB-nin ümumi həcmi 15 milyon manat olan iki istiqraz buraxılışı tam yerləşdirilib. Buraxılışlar üzrə daxil olan sifarişlərin ümumi məbləği 22,173,200 manat olub ki, bu da təklif olunan həcmdən təxminən 1.5 dəfə çoxdur.

Bir illik, illik gəlirliliyi 8.5% olan 5 milyon manatlıq buraxılışa 8,421,500 manatlıq sifariş gəlib. Bu, təklifdən təxminən 1.7 dəfə çoxdur. Abunə yazılışında 83 investor iştirak edib, 347 sifariş təqdim olunub. Onlardan 345-i icra edilib, nəticədə 81 investorun sifarişi təmin olunub.

İki illik, illik gəlirliliyi 9% olan 10 milyon manatlıq buraxılış üzrə isə 13,751,700 manatlıq sifariş daxil olub — təklifdən təxminən 1.4 dəfə çox. Abunə yazılışında 94 investor iştirak edib, 223 sifariş təqdim olunub. Bütün sifarişlər icra edilib və 94 investorun hamısı təmin olunub.

Nominal dəyəri 100 manat olan istiqrazlar bir illik buraxılış üzrə 50 min, iki illik buraxılış üzrə 100 min ədəd həcmində emissiya edilib. İstiqrazlar adlı, faizli, təmin edilməmiş və sənədsiz formada buraxılıb, faiz ödənişləri hər 30 gündən bir ediləcək. Fiziki şəxslər üçün istiqrazlardan əldə olunan faiz gəlirləri vergidən azaddır.

Yerləşdirmə Bakı Fond Birjasında kütləvi təklif (abunə yazılışı) üsulu ilə aparılıb, anderrayter qismində “ABB-İnvest” İnvestisiya Şirkəti çıxış edib. İstiqrazlar birjanın “Standart bazar” listinq seqmentinə daxil edilib və təkrar bazarda alqı-satqı imkanı da yaradılıb.