Lotereya və mərc oyunlarına 22% alternativ vergi rejimi gəlir

Azərbaycanda lotereya və mərc oyunlarına 22% alternativ vergi rejimi tətbiq ediləcək. Bunu İqtisadiyyat Nazirliyi yanında Dövlət Vergi Xidmətinin baş idarə rəisi Nicat İmanov deyib.

İmanovun sözlərinə görə, bu, ümumi vergi qaydalarından fərqli yanaşmadır və dünyada geniş yayılmış vergitutma mexanizmidir. Dövriyyədən uduş fondu çıxıldıqdan sonra qalan məbləğ vergiyə cəlb olunacaq, bu çərçivədə 22% vergi nəzərdə tutulur.

Əsas məqsəd vətəndaşların ölkə daxilində və ya xaricdə təşkil olunan qeyri-qanuni mərc oyunlarında iştirak edib vəsaitlərini qeyri-rəsmi yollarla xərcləməsinin qarşısını almaqdır. Eyni zamanda bu cür oyunların məhdudlaşdırılması və leqal bazarın imkanlarının genişləndirilməsi hədəflənir.

Operatorlara imkan yaradılır ki, gəlirlərindən daha çox vəsaiti uduş fonduna yönəltsinlər, uduşların həcmini və faiz nisbətini artırsınlar, oyunlara marağı yüksəltsinlər. Nəticədə vətəndaşların qeyri-rəsmi mərc oyunlarına ödəniş etməsinin qarşısının alınması və vergi ödəyiciləri üçün alternativ vergi rejiminin tətbiqi nəzərdə tutulur.