Nəqliyyat və anbar sektorunun gəliri 10 ayda 14 milyard manatı keçib

Bu ilin yanvar-oktyabr aylarında Azərbaycanda nəqliyyat və anbar təsərrüfatı sahəsində 14 milyard 288.8 milyon manat dəyərində xidmət göstərilib. Dövlət Statistika Komitəsinin məlumatına görə, bu, ötən ilin eyni dövrü ilə müqayisədə real ifadədə 10.2% çoxdur.

Göstərilən xidmətlərin 8 milyard 546.7 milyon manatı yük daşınmasının payına düşür — bu, ümumi həcmin 59.8%-dir. Sərnişin daşınması 3 milyard 860 milyon manat (27%), anbar təsərrüfatı və poçt xidmətləri isə 1 milyard 882.1 milyon manat (13.2%) təşkil edib.

Nəqliyyat sektorunda 205.1 milyon ton yük daşınıb ki, bu da ötən ilin eyni dövründən 3.4% çoxdur. Yüklərin 63.5%-i avtomobil, 25%-i boru kəməri, 7.6%-i dəmir yolu, 3.7%-i dəniz, 0.2%-i hava nəqliyyatı ilə daşınıb.

Hesabat dövründə 1 milyard 861.9 milyon sərnişin daşınıb, bu da ötən ilin eyni dövrü ilə müqayisədə 9.9% çoxdur. Sərnişinlərin 90%-i avtomobil nəqliyyatından, 9.3%-i metrodan istifadə edib, qalan hissəsi digər nəqliyyat növlərinə düşür.