Dövlət investisiya proqramı üzrə 309 layihəyə 1 milyard 623.8 milyon manat xərclənib

Bu ilin yanvar-sentyabr aylarında Azərbaycanda dövlət investisiya proqramı çərçivəsində 309 layihə icra edilib. Maliyyə Nazirliyinin 9 aylıq hesabatına görə, bu layihələr üçün nəzərdə tutulan vəsaitin təxminən 60%-i, yəni 1 milyard 623.8 milyon manat istifadə olunub.

Xərclənən vəsaitin 714.4 milyon manatı nəqliyyat layihələrinə yönəldilib. Su təsərrüfatı və meliorasiya layihələrinə 320.1 milyon manat, sair layihələrə 222 milyon manat ayrılıb. Energetika və sənaye layihələrinin payı 186.2 milyon manat, müdafiə və hüquq-mühafizə layihələrinin payı 93.4 milyon manat, sosial layihələrin payı isə 87.7 milyon manat olub.

Hesabat dövründə icra edilən layihələrin 86-sı su təsərrüfatı və meliorasiya, 65-i sosial, 62-si nəqliyyat sahəsinə aid olub. Müdafiə və hüquq-mühafizə üzrə 40, digər sahələr üzrə 43 layihə icra edilib. Energetika və sənaye layihələrinin sayı 13-dür.