Bakıda sənaye üçün süni intellekt agentləri hazırlayan hakaton keçiriləcək

Dekabr ayında Bakıda Azərbaycan sənayesinin ehtiyaclarına uyğun süni intellekt agentlərinin hazırlanmasına həsr olunmuş hakaton keçiriləcək. Bunu 4SİM-in icraçı direktorunun müavini Soltan Bayramov “Digital Impact Baku 2026” tədbirində çıxışı zamanı deyib.

Onun sözlərinə görə, hakatonun əsas məqsədi sənayenin real ehtiyaclarına uyğun süni intellekt həllərinin və prototiplərinin hazırlanmasını təşviq etməkdir. Tədbir ənənəvi komanda formatından fərqlənəcək: fərdi iştirak prinsipi əsasında qurulacaq, komanda rolunda isə süni intellekt agentləri çıxış edəcək.

Hakatonda gənc mütəxəssislər və startapçılar sənaye müəssisələrinin qarşılaşdığı konkret problemlərə uyğun texnoloji həllər hazırlayacaqlar. Soltan Bayramov sənaye müəssisələrinin nümayəndələrini təqdim olunacaq layihələrlə tanış olmağa və perspektivli iştirakçılarla əməkdaşlıq qurmağa çağırıb.

Onun sözlərinə görə, bu əməkdaşlıq startapların məhsullarının sınaqdan keçirilməsi, istedadlı mütəxəssislərin işə cəlb olunması və perspektivli layihələrin dəstəklənməsi formasında ola bilər. Hakatonun yekununda sənaye müəssisələrinin rəhbərlərinin iştirakı ilə görüş keçirilməsi də nəzərdə tutulur. Görüş müəssisələrin müəyyən etdiyi inkişaf yol xəritələrinin icrasını sürətləndirmək və rəhbərlik səviyyəsində dəstəyi gücləndirmək məqsədi daşıyır.