ADY 10 ayda 15 milyon 691 min ton yük daşıyıb

“Azərbaycan Dəmir Yolları” QSC (ADY) bu ilin yanvar-oktyabr aylarında 15 milyon 691 min ton yük daşıyıb. Şirkətin məlumatına görə, bu göstərici 2025-ci ilin eyni dövründəki 13 milyon 911 min tonla müqayisədə 13% çoxdur. Təkcə oktyabr ayında daşınan yükün həcmi 1 milyon 714 min tona çatıb və ötən ilin eyni ayına nisbətən 22% artıb.

Tranzit daşımalar da artıb. Yanvar-oktyabr aylarında tranzit yüklərin həcmi 6 milyon 582 min ton olub, illik müqayisədə artım 20%-dir. Oktyabr ayında 817 min ton tranzit yük daşınıb ki, bu da ötən ilin eyni ayından 49% çoxdur.

Konteyner daşımaları üzrə də artım var. 10 ayda ADY 132 min 500 TEU konteyner daşıyıb, 2025-ci ilin müvafiq dövründəki 112 min 400 TEU ilə müqayisədə bu, 18% çoxdur. Oktyabr ayında konteyner daşımalarının həcmi 16 min 200 TEU olub və ötən ilin eyni dövrünə nisbətən 67% artıb.

Çindən blok-qatarların qəbulu da artıb: 2026-cı ilin 10 ayında 472 blok-qatar qəbul edilib, bu göstərici ötən ilin müvafiq dövrü ilə müqayisədə 49% çoxdur.

Astara Terminalında yanvar-oktyabr aylarında 753 min 614 ton yük aşırılıb. Ötən ilin eyni dövründəki 550 min 210 tonla müqayisədə artım 37%-dir. Oktyabr ayında terminalda 122 min 216 ton yük aşırılıb ki, bu da aylıq ən yüksək nəticədir və 2025-ci ilin oktyabrına nisbətən 65% çoxdur.

Bakı Beynəlxalq Dəniz Limanında da tarixi maksimum qeydə alınıb. Cari ilin 10 ayında limanda 112 min TEU-dan çox konteyner aşırılıb ki, bu da indiyədək ən yüksək göstəricidir. Ötən ilin eyni dövrü ilə müqayisədə konteyner aşırılması 31% artıb.