ADY-nin rəqəmsal modernləşdirməsinə 6,163 milyon dollar xərclənib

Asiya İnkişaf Bankının (ADB) maliyyə dəstəyi ilə aparılan «Azərbaycan Dəmir Yolları» QSC-nin (ADY) rəqəmsal modernləşdirmə layihəsinə çəkilən xərclər 2025-ci ilin yekunlarına görə 6,163 milyon ABŞ dollarına çatıb. Bu barədə ADB məlumat verir.

Kredit sazişi çərçivəsində bunun 5,222 milyon dolları istifadə edilib. Bir sıra müraciətlər üzrə birbaşa maliyyələşdirmə 4,515 milyon dollar, əvəzi ödənilmiş xərclərin həcmi isə 707.15 min dollar olub.

Azərbaycan hökumətinin maliyyələşdirməsi 941,623 min dollara çatıb, bunun 940,123 min dolları əlavə dəyər vergisi üzrə xərclərdir.

Azərbaycanla ADB arasında 2025-ci il yanvarın 9-da 47 milyon dollarlıq kredit sazişi bağlanıb. ADY-nin rəqəmsallaşdırma proqramının ümumi dəyəri 55.46 milyon dollar həcmində qiymətləndirilir. Bunun 47 milyon dollarını ADB təqdim edir, qalan 8.46 milyon dolları Azərbaycan hökumətinin birgə maliyyələşdirməsi hesabına təmin edilir. Layihənin başa çatdırılması 2028-ci il iyunun 30-na nəzərdə tutulub.

Proqram ADY-nin hərtərəfli rəqəmsallaşdırılmasına və əsas biznes proseslərinin vahid məlumat idarəetmə platformasında birləşdirilməsinə yönəlib. Çərçivədə yük daşımalarının, aktivlərin, investisiya planlaşdırmasının və tikintinin, kommersiya fəaliyyətinin idarə edilməsi sistemlərinin yaradılması və tətbiqi, korporativ idarəetmə mexanizmlərinin modernləşdirilməsi nəzərdə tutulur. Layihə həm də İT infrastrukturunun gücləndirilməsini və şirkət əməkdaşlarının bacarıqlarının inkişafını əhatə edir.