Zəngilan Aqroparkı üçün ilk 500 min manat ayrılır

Zəngilan və Qubadlı rayonlarının ərazilərində Zəngilan Aqroparkı yaradılacaq. Bununla bağlı Prezident İlham Əliyev Fərman imzalayıb, sənətin mətni dövlət başçısının rəsmi internet saytında dərc olunub.

Fərman işğaldan azad edilmiş ərazilərin iqtisadi potensialından istifadəni, kənd təsərrüfatının bərpasını və inkişafını hədəfləyir. Aqroparkda müasir texnologiya və üsullarla rəqabətqabiliyyətli kənd təsərrüfatı məhsulları istehsal olunacaq, emal ediləcək, qablaşdırılacaq, saxlanılacaq, çeşidlənəcək və satılacaq, müvafiq xidmətlər də göstəriləcək.

Aqroparkın fəaliyyətinin təşkili, idarə olunması və inkişafı, dövlət dəstəyi tədbirlərində iştirak İqtisadiyyat Nazirliyinin tabeliyində İqtisadi Zonaların İnkişafı Agentliyinə həvalə edilib. Agentliyə layihələndirmə işləri üçün Prezidentin 2026-cı il dövlət büdcəsindəki ehtiyat fondundan ilkin olaraq 500 min manat ayrılacaq.

Nazirlər Kabineti iki ay müddətində Zəngilan şəhəri yaxınlığında 1424.55 hektar, Qubadlı rayonunun Tatar kəndi yaxınlığında 164.15 hektar kənd təsərrüfatı təyinatlı torpaq sahəsini icarəyə vermək hüququ ilə Agentliyin daimi istifadəsinə verməlidir. İqtisadiyyat Nazirliyi də iki ay müddətində Prezidentin Cəbrayıl, Qubadlı və Zəngilan rayonlarında xüsusi nümayəndəliyinin təkliflərini nəzərə alaraq aqroparkda istehsal və emal olunacaq aqrar-sənaye məhsulları üzrə prioritet istiqamətləri müəyyən etməlidir.

Fərmanda aqroparkın elektrik və istilik enerjisi, qaz, su, kanalizasiya, rabitə, yol-nəqliyyat, yanğından mühafizə, istehsal və emal, inzibati və sosial təyinatlı infrastruktur obyektləri ilə təchiz edilməsi nəzərdə tutulur. Aqroparkın idarə olunması və sahibkarlıq fəaliyyətinin təşviqi ilə bağlı bir neçə normativ hüquqi akta da dəyişiklik edilib.