İlham Əliyev borc tələbinin qiymətli kağızlara yönəldilməsi qanununu təsdiqləyib

Prezident İlham Əliyev oktyabrın 27-də Milli Məclisin qəbul etdiyi «İcra haqqında» və «Qiymətli kağızlar bazarı haqqında» qanunlarda dəyişiklik edilməsi haqqında qanunu təsdiqləyib. Dəyişiklik Azərbaycanda borc tələbinin qiymətli kağızlara yönəldilməsini nəzərdə tutur.

«İcra haqqında» qanuna «Tələbin borclunun qiymətli kağızlarına yönəldilməsi» adlı yeni 46-1-ci maddə əlavə edilib. Maddə tələbin borclunun özündə aşkar edilən sənədli qiymətli kağıza, borclunun adına qeydə alınmış sənədsiz qiymətli kağıza, həmçinin mərkəzi depozitarda saxlanılan sənədli qiymətli kağıza yönəldilməsi mexanizmini müəyyən edir.

Borclunun qiymətli kağızları barədə məlumatların sorğu edilməsi, onların üzərinə həbs qoyulması və tələbin həmin kağızlara yönəldilməsi ilə bağlı tədbirlər «Elektron icra» informasiya sistemi vasitəsilə təşkil edilir. Qanun «Qiymətli kağızlar bazarı haqqında» qanunda uyğunlaşdırma xarakterli müvafiq dəyişikliklərin edilməsini də nəzərdə tutur.