Tesla Cybercab üçün ilkin sifariş açıb: $29,990 və ayda $299

Tesla cümə axşamı elan edib ki, «seçilmiş müştərilər» şirkətin avtonom, qızılı rəngli Cybercab modelini şəxsi istifadə üçün ilkin sifariş etmək imkanı qazanıb. Yahoo Finance-in yazdığına görə, sifariş səhifəsi açılandan sonra şərtlər də aydınlaşıb.

Texnologiya icmalçısı Marques Brownlee qeyd edib ki, alıcılar maşını Texas-ın bir neçə şəhərindən birində qəbul etməlidir və Cybercab yalnız müəyyən coğrafi zonalarda hərəkət edəcək. Təxmini çatdırılma tarixi 2026-cı ilin dekabrdır.

Avtomobilin qiyməti $29,990-dır. Bundan əlavə, sahiblər maşından istifadə üçün ayda $299 ödəməlidir. Brownlee-nin paylaşımına cavab verən Tesla-nın baş direktoru Elon Musk deyib ki, Cybercab «tənzimləyici icazə alındıqca bütün ölkədə əlçatan olacaq». Aylıq ödənişin «çox yüksək» olduğunu da əlavə edib: «Bu, digər modellər üçün Tesla [Full Self-Driving] və rabitə xidmətinin dəyərinə uyğun olmalıdır, yəni təxminən ayda $115.»

Tesla-nın əməkdaşı Ashok Elluswamy coğrafi məhdudiyyətlər barədə əlavə məlumat verib. Onun sözlərinə görə, Cybercab «@robotaxi ilə eyni bütün coğrafi məntəqələrdə nəzarətsiz işləyəcək, sadəcə sahiblərin ehtiyaclarına xidmət edəcək».

Tesla bundan əvvəl Cybertruck istehsalını gələn il dayandıracağını və boş qalan zavod gücünü daha çox Cybercab yığmaq üçün istifadə edəcəyini açıqlamışdı. Şirkət bu qərarı Cybertruck satışlarının proqnozdan xeyli geri qalması ilə əsaslandırıb.