Çindən Azərbaycana blok qatarlarının sayı 40% artıb

2026-cı ilin yanvar-sentyabr aylarında Azərbaycan Dəmir Yolları Çindən 416 blok qatarı qəbul edib. Bu göstərici ötən ilin müvafiq dövrü ilə müqayisədə 40% artıb. Polşanın Gdansk şəhərində dəniz nəqliyyatı və logistika sahəsində ixtisaslaşan PortalMorski.pl portalında Mateusz Gibałanın müəllifliyi ilə yayımlanan məqalədə bu məlumat verilir.

Həmin dövrdə Azərbaycandan keçən dəmir yolu tranziti 15% artaraq 5.7 milyon tona çatıb. Yazıda Bakı Beynəlxalq Dəniz Limanı Orta Dəhlizin mühüm logistika mərkəzi kimi göstərilir. Hesabat dövründə limanda konteyner daşımaları 30% artıb.

Məqalədə Bakı-Tbilisi-Qars dəmir yolu xəttinin modernləşdirilməsi də xatırlanır. Nəticədə xəttin illik daşıma qabiliyyəti 5 milyon tona yüksəlib.

Müəllif qeyd edib ki, Orta Dəhliz Rusiya ərazisindən yan keçməklə Çin və Avropa arasında alternativ nəqliyyat marşrutu yaradır. Avropa istiqamətində Polşanın Gdansk, Varşava, Lodz və Slavkov şəhərləri də bu logistika şəbəkəsində yer alır.

Bakı limanının yükötürmə qabiliyyətinin 2030-cu ilədək 15 milyon tondan 25 milyon tona çatdırılması planlaşdırılır. Məqalədə nəqliyyat infrastrukturunun genişləndirilməsi və Azərbaycanın tranzit imkanlarının artırılması istiqamətində görülən işlər barədə də məlumat verilir.