Nazir müavini: azad edilmiş ərazilərdə güzəşt və kredit mexanizmləri genişlənib

İqtisadiyyat nazirinin müavini Azər Bayramov sahibkarlar üçün maliyyə alətlərinin, zəmanət və subsidiya mexanizmlərinin tətbiq dairəsinin genişləndiyini bildirib. Bu barədə o, Milli Məclisin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında danışıb.

Onun sözlərinə görə, ixracatçıların daşınma və gömrük rəsmiləşdirilməsi xərclərinin bir hissəsi kompensasiya olunur. İnvestisiya təşviqi mexanizmi aqroparklar və müasir istixanalar da daxil olmaqla strateji sahələrə şamil edilir.

Nazir müavini vurğulayıb ki, sahibkarlığa dövlət dəstəyi işğaldan azad edilmiş ərazilərdə xüsusi əhəmiyyət daşıyır: «Böyük Qayıdışın dayanıqlılığı orada yaradılan iş yerlərindən və istehsaldan asılıdır». Həmin ərazilərdə özəl sektor üçün geniş güzəşt və azadolmalar tətbiq olunur.

Azərbaycan Biznesinin İnkişafı Fondunun bu ərazilər üçün təqdim etdiyi kredit məhsulu kənd təsərrüfatı və akvakultura ilə yanaşı, təhsil, sosial xidmətlər və İKT layihələrini də əhatə edir. Bayramov qeyd edib ki, bu, özəl sektorun bərpa işlərinə töhfə verməsinə şərait yaradır.

Onun sözlərinə görə, həmin ərazilərdə idxalda vergi və gömrük güzəştlərinin tətbiq olunduğu fəaliyyət sahələrinə elmi tədqiqat və işləmələr də əlavə edilib. Bu güzəşt elmi-tədqiqatla məşğul olan subyektlər üçün avadanlıq və material xərclərini azaldır, elmlə istehsal arasında əlaqələrin gücləndirilməsinə imkan yaradır.