Nazir: bərpa olunan enerjinin payı 2035-ci ilədək 43%-ə çatacaq

Energetika naziri Pərviz Şahbazov noyabrın 10-da COP31 çərçivəsində külək enerjisinə investisiyalara həsr olunmuş Nazirlər və İnvestorların Plenar İclasında əsas məruzəçi kimi çıxış edib. Tədbiri Türkiyənin Enerji və Təbii Sərvətlər Nazirliyinin dəstəyi ilə Türkiyə Külək Enerjisi Assosiasiyası (TÜREB) və Qlobal Külək Enerjisi Şurası (GWEC) təşkil edib.

Energetika Nazirliyinin məlumatına görə, nazir çıxışında elektrik enerjisinə artan tələbatın etibarlı və münasib qiymətli enerji ilə ödənməsində, emissiyaların azaldılmasında külək enerjisinin yerini önə çıxarıb. O, bu sahəyə investisiya cəlb etmək üçün uzunmüddətli enerji alışı müqavilələrinin və investorlar üçün etimad mühitinin lazım olduğunu deyib.

Nazir bildirib ki, bərpa olunan enerji üzrə ümumi qoyuluş gücündə külək enerjisinin payı hazırda 14.3%-dir. Azərbaycanda bərpa olunan enerjinin ümumi elektrik enerjisi qoyuluş gücündə payının 2035-ci ilədək 43%-ə çatdırılmasında quru və dəniz külək elektrik stansiyaları əsas töhfəni verəcək.

Şahbazov Xəzərin Azərbaycana mənsub hissəsində 157 QVt külək enerjisi potensialı olduğunu xatırladıb. Onun sözlərinə görə, dəniz külək layihələri üçün ərazilər müəyyənləşdirilib, hüquqi baza yaradılıb və 4 QVt-dan çox gücdə layihələr planlaşdırılır.

Külək enerjisi “Xəzər-Qara dəniz-Avropa”, Naxçıvan vasitəsilə “Azərbaycan-Türkiyə-Avropa” və “Azərbaycan-Gürcüstan-Türkiyə-Bolqarıstan” yaşıl enerji dəhlizlərinin əsas mənbələrindən biri olacaq. Transxəzər dəhlizi Qazaxıstan və Özbəkistanın külək enerjisini Azərbaycan vasitəsilə daha geniş bazarlara çatdırmağa imkan verəcək.

Nazir beynəlxalq maliyyə institutlarını, investorları və şirkətləri əməkdaşlığa dəvət edib, Azərbaycanın bu istiqamətdə tərəfdaşları ilə işləməyə hazır olduğunu deyib. Tədbirdə Türkiyənin “Yaşıl Vətən Səfərbərliyi” layihəsi çərçivəsində onun adından ağac tinginin əkilməsinə görə təşəkkür sertifikatı da təqdim olunub.