Ağdam Sənaye Parkında metal məmulatları zavodu açılıb

Noyabrın 7-də Ağdam Sənaye Parkında “ASMC” Məhdud Məsuliyyətli Cəmiyyətinin metal məmulatları istehsalı müəssisəsi açılıb. Açılışda Prezident İlham Əliyev iştirak edib. “Almet Holding” Açıq Səhmdar Cəmiyyətinin təsisçisi Şirin Camallı dövlət başçısına müəssisənin fəaliyyəti barədə məlumat verib.

“ASMC” MMC 2024-cü ildə Ağdam Sənaye Parkının rezidenti kimi qeydiyyata alınıb. Onun əsas təsisçisi “Almet Holding” ASC-dir. Layihənin ümumi dəyəri 24.9 milyon manatdır və iki mərhələdə reallaşır. Birinci mərhələnin dəyəri 8.8 milyon manatdır; maliyyələşmədə özəl vəsaitlə yanaşı, İqtisadiyyat Nazirliyinin tabeliyində Azərbaycan Biznesinin İnkişafı Fondu tərəfindən subsidiyalaşdırılan 4.7 milyon manata yaxın bank krediti iştirak edib. İkinci mərhələ üçün 16.1 milyon manat investisiya nəzərdə tutulur.

Sənaye parkının rezidenti kimi müəssisə 470 min manat dəyərində ƏDV və gömrük rüsumlarından azad olunub. Təqribən 1.7 hektar ərazidə yerləşən zavod polad həsir, tikanlı, çəkilmiş, yanmış və sinklənmiş məftil, həmçinin mismar istehsal edəcək.

Birinci mərhələdə illik istehsal gücü 4 min 920 ton polad həsir, 3 min 480 ton çəkilmiş məftil, 3 min 180 ton mismar, 1800 ton yanmış məftil, 12 min ton məftil və 1080 ton soyuq deformasiya olunmuş armatur olacaq. İkinci mərhələdə ildə 10 min ton qalvanikləşdirilmiş və 8 min 240 ton yüksəkkarbonlu çəkilmiş məftil istehsalı planlaşdırılır.

Zavodun polad həsir, məftil və mismarı azad olunmuş ərazilərdə tikinti-bərpa işlərində geniş istifadə olunan materiallardır. Bu məhsulların bölgədə istehsalı tikinti layihələrinin materialla yerindən təminatına və daşınma xərclərinin azalmasına imkan yaradır. Müəssisədə İtaliya, Almaniya, Türkiyə və Çinin aparıcı şirkətlərinin avadanlığı quraşdırılıb; məhsulların daxili bazarda satışı ilə yanaşı, ixracı da nəzərdə tutulur.

Hazırda zavodda 26 nəfər çalışır. Müəssisə tam gücü ilə işə düşəndən sonra daimi iş yerlərinin sayı 100-ə çatdırılacaq.