Göyçayda nar bağdan 1 manata, bazarda 10 manatadək satılır

Göyçay rayonunda narın kütləvi yığımı davam edir. Yaz aylarında havaların yağmurlu keçməsi məhsuldarlığa müəyyən qədər təsir göstərsə də, builki satış qiymətləri fermerləri qane edir. Bağlardan toplanan məhsulun bir hissəsi xarici bazarlara göndərilir, digər hissəsi ölkənin müxtəlif bölgələrində satışa çıxarılır.

Bağlarda iş səhər tezdən başlayır. Qadınlar narları qayçı ilə toplayır, kişilər isə məhsulu nəqliyyat vasitələrinə yükləyir. Ucar sakini Səmaqət Nuhova da mövsümi işlərə qoşulanlardandır. Onun sözlərinə görə, məhsul boldur və yığım zamanı narın zədələnməməsinə çalışılır.

İxrac üçün nəzərdə tutulan nar artıq xarici bazarlara göndərilib. Böyük bağlardan toplanan məhsulun əsas hissəsi kəndlərdəcə yük avtomobillərinə yüklənir və Rusiya, Ukrayna, Belarus və digər ölkələrin bazarlarına aparılır. Bağdan alıcıya təqdim olunan narın kiloqramı keyfiyyətindən və ölçüsündən asılı olaraq 1 manatla 1 manat 70 qəpik arasında dəyişir.

Fermer Eyvaz Səmədov qiymət fərqinin əsas səbəblərindən birini nəqliyyat və digər əlavə xərclər adlandırır. Onun sözlərinə görə, bağdan 1 manata alınan nar nəqliyyat xərci ilə Göyçay bazarına 1 manat 20 qəpiyə başa gəlir və orada 1 manat 50 qəpiyə satılır. Bakıya aparıldıqda isə qiymət 1 manat 70 qəpik, 1 manat 90 qəpik, bəzən 2 manata çatır. Fermer deyir ki, daşınma xərcləri var və satıcı da öz qazancını əldə etməlidir.

Eyvaz Səmədov dövlətin aqrar sahəyə dəstəyinin təsərrüfatların inkişafında rol oynadığını vurğulayır. Onun sözlərinə görə, subsidiyaların verilməsi və sahibkarlara yaradılan imkanlar yeni bağların salınmasına şərait yaradır.

Kiçik bağlarda xüsusi qulluqla yetişdirilən iri narlar əsasən Göyçay bazarına çıxarılır. Satıcı Teymur Qəmbərovun sözlərinə görə, hazırda narın kiloqramı 3 manatdan 10 manatadək dəyişir, təxminən 10 gündən sonra 17-20 manat olan narlar da olacaq. O, paytaxt bazarlarında Göyçay narı adı ilə ucuz satılan məhsulların hamısının bu rayonda yetişdirilmədiyini də deyir.

Göyçay sakini Araz İsmayılov narı birbaşa bağlardan almağın daha sərfəli olduğunu düşünür. Hazırda Göyçay bazarında “Şirin”, “Vələs”, “Şıxbaba”, “Gülövşə” və digər növlər də daxil olmaqla, 10-a yaxın nar çeşidi satılır. Nardan hazırlanan mürəbbə, şərab, turşu və təbii şirələr də alıcılara təklif olunur.

Göyçay Dövlət Aqrar İnkişaf Mərkəzinin Bitkiçilik sektorundan verilən məlumata görə, rayonda ümumilikdə 3178 hektar nar bağı var, məhsulun saxlanılması üçün 9 soyuducu anbar fəaliyyət göstərir. Mərkəz bildirir ki, son illər narçılığa maraq artır, yeni bağlar salınır və mövcud təsərrüfatlar genişlənir.

Nar Göyçayın bütün kəndlərində becərilsə də, “Bığır”, “Alxasava”, “Veysəlli”, “Qaraxıdır” və “Qarayazı” kəndlərində bu sahə daha geniş yayılıb. Emal müəssisələrinə təhvil verilən narın kiloqramı 30 qəpikdən, süfrəlik narın qiyməti isə növündən və keyfiyyətindən asılı olaraq 1 manatdan 10 manatadək dəyişir. Ənənəvi “Nar bayramı”nın bu il təşkili nəzərdə tutulmur.