Azərikard Mastercard ilə süni intellekt əsaslı skorinq həllini təqdim edib

“Azərikard” “Mastercard” ilə birgə hazırladığı süni intellekt əsaslı davranış skorinqi həllini təqdim edib. Təqdimat Azərbaycanın bank, mikromaliyyə və fintek sektorundan olan nümayəndələrin iştirakı ilə keçirilən tədbirdə baş tutub.

Yeni həll ödəniş əməliyyatlarını təhlil edərək maliyyə institutları üçün əlavə analitik göstəricilər çıxarır. Bu, risklərin daha dolğun qiymətləndirilməsinə şərait yaradır. Sistem ənənəvi skorinq modellərini əvəz etmir — onları davranış göstəriciləri ilə tamamlayır. Süni intellekt vasitəsilə müştərilərin ödəniş davranışı araşdırılır, maliyyə qurumları risk qiymətləndirməsi və qərar qəbulu üçün əlavə analitik imkanlar əldə edir.

“Azərikard” Prosessinq Mərkəzinin Baş direktoru Fərid Quliyev deyib ki, məqsəd ödəniş ekosistemində yaranan məlumatları maliyyə sektoru üçün real dəyərə çevirməkdir. Onun sözlərinə görə, “Mastercard”la birgə hazırlanan həll qabaqcıl analitika və əlavə dəyər yaradan texnoloji xidmətlərin inkişafında növbəti addımdır. Quliyev əmin olduğunu bildirib ki, yenilik maliyyə institutlarının əsaslandırılmış qərarlar qəbul etməsinə və ölkədə maliyyə xidmətlərinin inkişafına töhfə verəcək.

“Mastercard”ın Türkiyə və Azərbaycan üzrə Baş direktoru Onur Faydacı qeyd edib ki, rəqəmsal ödənişlərin genişlənməsi müştərilərin maliyyə davranışını daha yaxından anlamaq üçün yeni imkanlar açır. Onun fikrincə, “Azərikard”la əməkdaşlıq çərçivəsində hazırlanan həll maliyyə institutlarına daha əhatəli analitik məlumat verərək risklərin idarə olunmasını təkmilləşdirəcək və maliyyə inklüzivliyinin genişlənməsinə dəstək olacaq.

Tədbir çərçivəsində “Azərikard” Azərbaycan Fintex Assosiasiyası, Azərbaycan Mikromaliyyə Assosiasiyası və “Rabitəbank” ilə əməkdaşlıq memorandumları imzalayıb. Sənədlər yeni texnoloji həllin tətbiq imkanlarının araşdırılması, maliyyə ekosistemində tərəfdaşlıq əlaqələrinin genişləndirilməsi və məlumat əsaslı maliyyə xidmətlərinin inkişafı üçün əməkdaşlıq çərçivəsi yaradır.