Azercell və AKM 4000 AZN mükafatlı kiberhakaton keçirir

Azercell və Azərbaycan Kibertəhlükəsizlik Mərkəzi (AKM) «FireWall 2026» adlı hakaton təşkil edir. Mərkəz IRIA-nın nəzdində fəaliyyət göstərir. Yarış kibertəhlükəsizlik sahəsində gənc istedadları üzə çıxarmaq və onların inkişafına dəstək vermək məqsədi daşıyır. Tədbir «Azərbaycan Respublikasının informasiya təhlükəsizliyi və kibertəhlükəsizliyə dair 2023–2027-ci illər üçün Strategiyası» üzrə Tədbirlər Planı çərçivəsindədir.

Hakaton 5–6 dekabr 2026-cı ildə Azərbaycan Kibertəhlükəsizlik Mərkəzində baş tutacaq. 18 yaş və yuxarı Azərbaycan Respublikası vətəndaşları mübarizəyə qoşula bilər. Seçim mərhələsindən sonra hər biri ən çoxu 5 nəfərdən ibarət 10 komanda yarışa buraxılacaq. Komandalar kibertəhlükəsizlik, rəqəmsal məlumatların qorunması, risklərin idarə edilməsi və süni intellekt sistemlərinin təhlükəsizliyi ilə bağlı real problemlər üzərində çalışacaq. İştirakçılara həllərin ilkin işlək versiyasını hazırlamaq üçün 24 saat veriləcək. Məqsəd konkret problemləri həll edən yeni məhsulların yaradılmasına və texnoloji həllərin təkmilləşdirilməsinə şərait yaratmaqdır.

Nəticələrə görə I yerə 4000 AZN, II yerə 3000 AZN, III yerə 2000 AZN pul mükafatı veriləcək. Təşkilatçılar kibertəhlüküsizlik biliklərini praktikada sınamaq, komanda ilə innovativ həll hazırlamaq və ideyanı işlək məhsula çevirmək istəyənləri yarışa dəvət edir. Qeydiyyat 12–30 noyabr 2026-cı il tarixlərində aparılır.