Grok nədir: X-in süni intellekti nə bacarır, neçəyədir

Grok — Elon Maskın şirkətlərinin hazırladığı süni intellekt köməkçisidir. İstifadəçilər onunla X sosial şəbəkəsinin içində, grok.com saytında və iOS, Android tətbiqlərində yazışırlar. Başqa çat-botlardan əsas fərqi X-dəki ictimai paylaşımları real vaxtda oxumasıdır. Qiyməti və dil dəstəyi digər alətlərlə yanaşı süni intellekt proqramlarının müqayisə cədvəlində verilib. Dil modelinin necə işlədiyini süni intellekt nədir bələdçisi sadə dillə açır.

Grok-un arxasındakı şirkət: xAI-dan SpaceXSI-yə

Maskın 2023-də qurduğu xAI Grok-u 3 noyabr 2023-də təqdim etdi və elə ilk elanda onun X-dən real vaxtda bilik aldığını əsas üstünlük adlandırdı. 2 fevral 2026-da SpaceX xAI-ı aldığını açıqladı. Şirkət əvvəlcə SpaceXAI adlandı, oktyabrdan isə SpaceXSI (SpaceX Super Intelligence) adını daşıyır, qiymət və qaydalar səhifələrinin altında indi bu ad yazılır.

Adların çoxluğu oxucu üçün bir yerdə vacibdir: məlumatlarınızın kimdə olduğu. SpaceXSI-nin məxfilik siyasətində yazılıb ki, şirkət X Corp.-dan ayrıdır. X-in içindəki Grok isə X-in öz ayarlarına tabedir, App Store-da tətbiqin satıcısı kimi də X Corp. göstərilib. Bir alət üçün iki şirkət və iki məxfilik siyasəti var.

Grok Azərbaycanda işləyirmi, azərbaycanca danışırmı?

İşləyir. X-in kömək mərkəzi yazır ki, Grok X-in açıq olduğu bütün ölkələrdə əlçatandır (About Grok). 4 noyabrda Bakıdakı internet bağlantısı ilə grok.com-u açanda sayt qeydiyyat istəmədən sual pəncərəsini göstərdi, model menyusunda Fast, Auto, Expert və Heavy rejimləri göründü, Imagine bölməsi də girişsiz açıldı. Tətbiq App Store-un Azərbaycan bölməsində də pulsuz yüklənir.

Menyunun dili başqa məsələdir. Saytın dil siyahısında 31 dil var, App Store səhifəsi tətbiq üçün ingilis dili ilə birlikdə 39 dil sayır. Türk və rus dilləri hər iki siyahıdadır, azərbaycan dili heç birində yoxdur.

Cavabların keyfiyyəti barədə şirkətin ölçüsü yoxdur. Azərbaycan App Store-undakı rəylərdən birində istifadəçi yazır ki, bot azərbaycanca cavab verir, lakin cümlələri qəribə və dolaşıq qurur, səsli rejimdə də danışığı türkcə kimi tanıyıb mətni səhv yazır. Bu, bir nəfərin təcrübəsidir. Yazılı cavabı yaxşılaşdırmaq üçün söhbətin əvvəlinə belə bir qayda yapışdırmaq olar:

Bütün cavabları ədəbi azərbaycan dilində yaz. Türk sözlərini işlətmə: önəmli əvəzinə vacib, yöntəm əvəzinə üsul, çözüm əvəzinə həll yaz. Cümlələr qısa olsun. Bilmədiyin rəqəmi və tarixi uydurma, onun yerinə sual işarəsi qoy.

Prompt yazmağın qalan qaydaları, yəni rol, nümunə və nəticənin forması prompt nədir bələdçisində ayrıca izah olunub.

Grok nə bacarır?

Ən çox danışılan funksiya X-dədir. İstənilən paylaşımın altında @grok yazıb sual vermək olur və cavab hamının görəcəyi şərh kimi düşür. Model ictimai paylaşımlarda və vebdə axtarış aparır, bunu şirkətin istifadəçilər üçün tez-tez verilən suallar səhifəsi də təsdiq edir. Bundan başqa:

• Imagine mətndən şəkil və video yaradır. 7 avqust 2026-da çıxan Image 2.0 afişadakı kiçik yazını daha dəqiq çəkir, fonu silir, bir dəfəyə 5 şəkli birləşdirə bilir (Imagine Image 2.0). Video modeli 1080p-yə qədər görüntü verir.
• Voice səsli söhbətdir.
• Build sadə sayt, tətbiq, oyun və interaktiv dashboard yığır. Proqramçılar üçün Grok Build adlı kod agenti də var, 19 avqustdan vebdə və telefonda bütün planlarda açılır.
• Grok Bot öz kompüteri olan və tapşırığı arxa planda davam etdirən agentdir. Belə agentlərin gündəlik işə necə qoşulduğunu AI agent nədir yazısı göstərir.
• Word, Excel, PowerPoint və Outlook üçün əlavələr 2026-nın iyun-iyul aylarında çıxıb, Google Workspace üçün də əlavə var.

Model versiyaları tez dəyişir. 22 iyulda Grok 4.5 grok.com-a, X-ə və tətbiqlərə gəldi. 21 sentyabrda çıxan Grok 4.7 şirkətin kod və ofis işi üçün ən güclü modeli kimi təqdim olundu, ilk gün Cursor, Grok Build və API-də açıldı. Pulsuz istifadəçinin hansı versiyaya düşdüyünü sayt göstərmir, menyuda yalnız rejimlərin adı var.

Grok pulsuzdurmu və planlar neçəyədir?

Pulsuz plan var, limiti məhduddur. 12 oktyabr 2026-dan şirkət Grok-u, X Premium-u və proqramçılar üçün Cursor redaktorunu The X Subscription adlı vahid abunəyə yığıb (elan). Köhnə SuperGrok, X Premium və Premium+ planları yeni müştərilərə satılmır. Onları əvvəldən alanlar öz qiymətində qala və ya yeni plana keçib köhnə abunənin qalan hissəsinin pulunu geri ala bilərlər.

Plan	Ayda	Manatla	İstifadə həddi	Nə daxildir
Free	0	0	məhdud	Grok çatı, Cursor üçün başlanğıc limit, adi X hesabı
Plus	8 $	13.6 ₼	baza	Chat, Voice, Imagine, Build, API girişi; X-də nişan, daha az reklam
Premium	30 $	51 ₼	Plus-ın 4 qatı	ən yeni modellər, Grok Bot, şəkil və video yaratma; köhnə SuperGrok, Cursor Pro və X Premium+ imkanları
Super	100 $	170 ₼	Plus-ın 15 qatı	15 saniyəlik 1080p video, pik saatlarda prioritet
Ultra	200 $	340 ₼	Plus-ın 50 qatı	ən yüksək limit
Teams	bir nəfərə 30 $-dan	51 ₼-dan	ortaq limit	mərkəzi ödəniş, SSO, admin idarəsi

Mənbə: x.ai/pricing, noyabr 2026. Manatla hesab Mərkəzi Bankın 4 noyabr məzənnəsi ilədir, səhifənin qeydində yazılıb ki, ƏDV və digər vergilər qiymətə daxil deyil.

Limit aylıq deyil, həftəlik yenilənir və Grok ilə Cursor arasında ortaq hovuzdan xərclənir. Şirkət yeni AI istifadəçilərinə Premium-u, X-də yalnız paylaşım edən müəlliflərə Plus-ı tövsiyə edir. Kiçik biznesin çoxu üçün seçim Free ilə Plus arasında gedir: Plus həm çatın limitini artırır, həm də X hesabına nişan verir. Gündəlik video hazırlayan SMM komandaları tez Premium-a keçəcəklər.

Ucuz abunə axtaranlar üçün bir yerli müşahidə var. tap.az-da chatgpt sözü ilə axtarış ChatGPT hesabı və ya abunəsi təklif edən 7 elan çıxardı, qiymətlər 5–18 ₼ arasında idi. grok və supergrok sözləri bir dənə də elan vermədi, lalafo.az-da grok axtarışının yeganə nəticəsi proqramlaşdırma kitabı oldu.

SpaceXSI qiymət səhifəsində yazır ki, abunəni yalnız X Subscription Corp. satır və başqa yerdən alınan hesablar istənilən vaxt bağlana bilər. Ödəniş bank kartı ilə qəbul olunur, Azərbaycan bankının kartı ilə ödənişi yoxlamamışıq.

Grok-dan necə istifadə etməli: ilk 15 dəqiqə

1. Rəsmi girişi seçin. grok.com, X tətbiqindəki Grok bölməsi və ya telefon mağazasındakı rəsmi tətbiq. Grok AI adı ilə çıxan hər tətbiq SpaceXSI-nin deyil, tərtibatçının adına baxın.
2. Hesab açın. Girişsiz də yazmaq olur, ancaq Consumer FAQ xəbərdarlıq edir ki, bəzi regionlarda (AB və Britaniya istisnadır) hesabsız söhbətlər anonim saxlanılır və onları öyrətmədən çıxarmaq imkanı olmur. Regionların siyahısı verilmir, ona görə iş üçün hesabla daxil olmaq daha təhlükəsizdir.
3. Öyrətmə ayarını söndürün. Saytda Settings → Data → Improve the Model, tətbiqdə Settings → Data Controls → Improve the model.
4. Həssas iş üçün Private Chat açın. Sağ yuxarıdakı xəyal şəkilli ikon söhbəti tarixçədən çıxarır, şirkət onu 30 gün ərzində silir.
5. Rejimi tapşırığa görə seçin. Qısa sual üçün Fast kifayətdir, çoxaddımlı hesab üçün Expert seçin. Fərqi eyni sualı iki rejimdə verməklə görmək olar.

Üç hazır tapşırıq və nəticənin yoxlanması

1. X-də brend haqqında nə yazılır. ChatGPT və Gemini-dən fərq məhz buradadır:

Son 7 gündə X-də [brendinizin və ya rəqibin adı] haqqında yazılmış ictimai paylaşımları tap. Ən çox təkrarlanan 5 şikayəti və 3 tərifi ayır, hər birinin yanında 2 paylaşımın linkini ver. Paylaşım tapmasan, tapmadım yaz.

Cavabdakı linkləri bir-bir açın: paylaşım həqiqətən varmı, tarixi son həftəyə düşürmü, beş şikayətin üçünü eyni hesab yazmayıb ki? Yerli müştərilərinizin X-də nə qədər yazdığını da bu siyahı göstərəcək. Müzakirə Instagram və ya Telegram-dadırsa, bot onu görmür.

2. Kafe üçün afişa Imagine ilə.

Kvadrat format, açıq boz fon, ortada ağ fincanda qəhvə, yuxarıda iri hərflərlə «Səhər qəhvəsi 3 ₼», aşağıda kiçik hərflərlə ünvan. Real insan olmasın.

Şəkildəki yazını hərf-hərf oxuyun, xüsusən ə, ş və ğ hərflərini, qiymətin düz çıxdığına da baxın. Müştərinin və ya işçinin fotosunu redaktəyə verməyin, bunun səbəbi aşağıdakı qalmaqal bölməsindədir.

3. Şikayətə cavab.

Aşağıdakı müştəri şikayətinə nəzakətli cavab yaz, 4 cümlədən uzun olmasın. Endirim, pul qaytarma və çatdırılma tarixi vəd etmə, yalnız nə edəcəyimizi və nə vaxt zəng edəcəyimizi yaz. Şikayət: [mətn]

Cavabda türk sözü, vəd etmədiyiniz endirim və ya uydurma tarix qalıbsa, göndərməzdən əvvəl özünüz düzəldin.

«@grok, bu doğrudur?» sualına nə qədər güvənmək olar?

«Grok X-in öz alətidir, X-dəki xəbəri ondan yaxşı kim bilər?» Ölçülmüş cavab ürəkaçan deyil. İspaniyanın Fundación Maldita.es fakt yoxlama təşkilatı Xaen Universiteti ilə birlikdə 2026 Dünya Çempionatı zamanı X-də yayılan 46 iddia üzrə 766 sorğunu təhlil edib və nəticəni 27 oktyabr 2026-da dərc edib. Tədqiqatçıların öz hesabından verdiyi 278 sualın yalnız 107-sinə (38.5%) cavab gəlib. Təhlil olunan 317 cavabın 59.9%-i düz, 26.8%-i səhv, 13.2%-i qismən düz çıxıb.

Fərqi formatlar yaradıb. Yazılı iddiada model 72 cavabın 69-unda haqlı olub, şəkil və videoda isə 245 cavabın 121-ində, yəni təxminən yarısında. Süni intellektlə yaradılmış, Braziliya forması geyinmiş it videosu barədə «real görünür» deyib. Birdən çox cavab verdiyi 40 paylaşımın 21-ində eyni post haqqında hökmünü fakt yoxlaması dərc olunmazdan əvvəl dəyişib.

Biznes üçün buradan konkret bir qayda çıxır. Müştərilərin göndərdiyi ödəniş qəbzlərinin, çatdırılma fotolarının və ya zədəli məhsul şəkillərinin həqiqiliyini Grok-a yoxlatmaq olmaz. Mətndə yazılmış iddianı yoxlamaqda o, daha etibarlıdır, lakin orada da mənbə linkini istəyib açmaq lazımdır.

Grok hansı qalmaqallara düşüb, tənzimləyicilər nə edib?

2025–2026-da Grok bir neçə ölkədə məhkəmələrin və tənzimləyicilərin gündəminə düşüb. Əsas hadisələr cədvəldədir.

Tarix	Nə baş verib	Kim nə edib
8–9 iyul 2025	Yeniləmədən sonra bot X-də antisemit paylaşımlar yazdı, Hitleri tərifləyən cavablar verdi, Türkiyə prezidenti haqqında təhqiramiz cümlələr işlətdi	xAI paylaşımları sildi; Ankara cinayət məhkəməsi Türkiyədə Grok-a girişin bağlanmasını əmr etdi (Times of Israel, AP)
dekabr 2025 – yanvar 2026	X-də real insanların fotolarını açıq-saçıq görüntüyə çevirmək dalğası	CCDH hesablayıb ki, 11 gündə alət təxminən 3 milyon seksual şəkil yaradıb, onlardan ~23,000-i uşağa bənzəyir (The Star, AFP)
9–11 yanvar 2026	X-də şəkil yaratma ödənişli abunəçilərlə məhdudlaşdırıldı	İndoneziya və Malayziya Grok-a girişi müvəqqəti bağladı (The Star)
12 yanvar 2026	Britaniya araşdırması	Ofcom Online Safety Act üzrə X-ə qarşı rəsmi araşdırma açdı, cərimə həddi 18 milyon funt və ya dünya gəlirinin 10%-idir (Engadget)
26 yanvar 2026	AB araşdırması	Avropa Komissiyası Rəqəmsal Xidmətlər Aktı (DSA) üzrə X-ə qarşı rəsmi proses başlatdı (Komissiyanın açıqlaması)
17 fevral 2026	İrlandiyada GDPR araşdırması	Data Protection Commission şəkillərin yaradılması və yayılması üzrə geniş miqyaslı araşdırma açdı (DPC)

Komissiya açıqlamasında yazıb ki, risklər «görünür, artıq reallaşıb» və AB vətəndaşlarına ciddi zərər vurub. Noyabr 2026-ya qədər bu üç araşdırmanın heç birində yekun qərara rast gəlmədik, Azərbaycanda Grok-a qarşı rəsmi addım barədə də məlumat yoxdur. Bir praktik detal da var. X-in kömək mərkəzi qeyd edir ki, qrup çatına @Grok əlavə ediləndə X və şirkət o andan Grok çıxarılana qədər yazılan bütün mesajları görür. İşçilərin qrup söhbətinə botu çağırmazdan əvvəl bunu bilmək lazımdır.

X paylaşımlarınız Grok-un öyrədilməsinə gedirmi?

Gedə bilər və X-in kömək səhifəsi bunu gizlətmir. X ictimai paylaşımlarınızı, onların bəyənmə və repost məlumatlarını, ictimai profilinizi, həmçinin X-in içində Grok ilə yazışma və səsli söhbətlərinizi modelləri öyrətmək üçün xAI ilə paylaşa bilər. Ayar X-də belə tapılır: Settings and privacy → Privacy & Safety → Data sharing and personalization → Grok & Third-party Collaborators. Orada data paylaşımına icazə verən qutunun işarəsini götürmək kifayətdir. Hesabı Protect your posts ayarı ilə bağlamaq da paylaşımları öyrətmədən çıxarır, lakin onda yazılarınızı izləyicilərdən başqa heç kim görmür.

grok.com və Grok tətbiqi üçün ayar ayrıcadır, yuxarıdakı addımlarda göstərilib. İmtinadan sonra da bəyənmə və ya bəyənməmə ilə verdiyiniz rəy öyrətməyə gedə bilər. Şirkət biznes və korporativ müştərilərin məzmunundan modeli yaxşılaşdırmaq üçün istifadə etmədiyini yazır.

Avropa İttifaqında bu mövzu ayrıca araşdırılır. İrlandiyanın DPC-si 11 aprel 2025-də AB istifadəçilərinin ictimai paylaşımlarının Grok-u öyrətmək üçün qanuni emal olunub-olunmadığını yoxlamağa başladı. Azərbaycandan belə bir araşdırma barədə xəbər yoxdur, burada qorunma əsasən öz ayarınızdan asılıdır. Müştəri adı, FİN kod, müqavilə məbləği olan mətni çat-bota verməzdən əvvəl [Müştəri A], [məbləğ] kimi işarələrlə əvəz etmək ən sadə yoldur.

Grok biznesdə ikinci alət kimi

• X-də rəqib, brend və sahə müzakirəsini izləmək onun ən güclü tərəfidir. Auditoriyanız X-də yoxdursa, bu üstünlük də işləmir.
• Reklam şəkli və qısa video üçün Imagine Plus planında da açılır, real insanların fotosu ilə işləməmək şərti ilə. Şəkil alətlərinin müqayisəsi süni intellektlə şəkil düzəltmək bələdçisindədir.
• Uzun müqavilə və tender sənədləri üçün Claude, Gmail və Google Sheets ilə işləyən komandalar üçün Gemini daha təbii seçimdir.
• Word və Outlook-da Microsoft-un öz köməkçisi ilə işləmək istəyənlər üçün Microsoft Copilot var, Grok-un əlavələri ona alternativ ola bilər.
• Azərbaycanca mətn yazmaq lazımdırsa, ChatGPT ilə müqayisə üçün ChatGPT-nin azərbaycanca imkanlarına baxın. Öz serverində ucuz model işlətmək istəyənlər DeepSeek-in risklərini oxumalıdırlar.
• Foto və videonun həqiqiliyini yoxlamaq üçün bu alət yaramır, bunu yuxarıdakı tədqiqatın rəqəmləri göstərir.

Bizcə, Grok kiçik biznes üçün ikinci alətdir: əsas işləri başqa köməkçi görür, Grok isə X-də nə danışıldığını göstərir və tez vizual hazırlayır. Plus planı o halda pulunu çıxarır ki, müştəriləriniz və rəqibləriniz X-də fəaldırlar.

X-də rəqib müzakirəsini hər səhər toplayıb qısa hesabat kimi göndərən köməkçini əl ilə yox, agentlə qurmaq olar. Hermes AI Agent ilə belə şəxsi köməkçi qurmaq KURS: AI Agent & YouTube biznesi modullarından birinin mövzusudur.

Hesabın əsası: dollar qiymətləri AMB-nin 04.11.2026 rəsmi kursu ilə manata çevrilib (1 $ = 1.70 ₼), məsələn 8 × 1.70 = 13.6 ₼, 30 × 1.70 = 51 ₼. tap.az və lalafo.az axtarışı eyni gün edilib. Vergi və bankın konvertasiya haqqı daxil deyil.