Saatlıq minimum əməkhaqqı ilk mərhələdə aqrar sahədə tətbiq olunacaq

Əmək Məcəlləsinə və digər sənədlərə dəyişiklik layihəsi saatlıq minimum əməkhaqqı sistemini gətirir. Bu barədə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəisi Vəli Quliyev Milli Məclisin İqtisadi siyasət, sənaye və sahibkarlıq komitəsinin iclasında danışıb.

Onun sözlərinə görə, layihə dörd istiqamət üzrə dəyişiklik nəzərdə tutur: saatlıq minimum əməkhaqqının tətbiqi, əməkhaqqı ödənişinin elektronlaşdırılması, uşağa qulluğa görə müavinətin təyin edilməsi şərtlərinin təkmilləşdirilməsi və işçilərin əmək məzuniyyətindən istifadə hüququnun daha səmərəli təmin edilməsi.

Hazırda ölkədə minimum əməkhaqqı aylıq əsasda müəyyən edilir. Quliyev bildirib ki, natamam iş vaxtında çalışan və qısa müddətə əmək müqaviləsi bağlayan işçilərin əməkhaqqının hesablanması daha çevik yanaşma tələb edir. Bu məqsədlə aylıq minimum əməkhaqqı ilə yanaşı, saatlıq minimum əməkhaqqı anlayışının da Əmək Məcəlləsinə daxil edilməsi və onun tətbiqinin hüquqi əsaslarının müəyyən olunması təklif edilir.

Dəyişikliklərə əsasən, iqtisadiyyatın fəaliyyət sahələrindən bir aydan az müddətdə əmək münasibətinin bağlanması, həmçinin fəaliyyət sahəsindən asılı olmayaraq həftəlik iş vaxtının 20 saatdan az olduğu hallarda əməkhaqqı saatlıq sistemlə hesablanacaq. Sistemin tətbiq olunacağı sahələri Nazirlər Kabineti müəyyən edəcək. İlkin mərhələdə kənd təsərrüfatı məhsullarının istehsalı və ictimai iş sahələrinin əhatə olunması nəzərdə tutulur. Nəticədə işçilərin əməkhaqqı faktiki işlədiyi vaxta uyğun hesablanacaq.

Xidmət rəisi bildirib ki, dəyişiklik beynəlxalq təcrübəyə uyğundur və dövlət və büdcə üçün maliyyə yükü yaratmayacaq.