Komitədə büdcə zərfinə daxil olan üç qanun layihəsi müzakirəyə çıxarılıb

Noyabrın 6-da Milli Məclisin İqtisadi siyasət, sənaye və sahibkarlıq komitəsi iclas keçirib. Komitə sədri Azər Əmiraslanov gündəliyə üç məsələnin daxil edildiyini bildirib. Onun sözlərinə görə, dövlət büdcəsi zərfinə daxil olan qanun layihələri iqtisadiyyatın inkişafını və iqtisadi fəallığın artırılmasını təmin edən mexanizmləri, stimullaşdırıcı tədbirləri, habelə vergi güzəştlərini ehtiva edir.

Maliyyə Nazirliyi Aparat rəhbərinin müavini Asif Qasımov birinci məsələni təqdim edib. Söhbət Mülki Prosessual Məcəllədə, Miqrasiya Məcəlləsində, şəhid ailələrinə güzəştlər, konsul nizamnaməsi, pasportlar, şəxsiyyət vəsiqəsi, istehlakçı hüquqları, müflisləşmə, yol hərəkəti, qaçqınların statusu, notariat, dövlət rüsumu, icra, daşınmaz əmlakın dövlət reyestri, baytarlıq, fitosanitar nəzarəti və torpaqların dövlət ehtiyacları üçün alınması ilə bağlı qanunlarda dəyişikliklərdən gedir. Layihə dövlət rüsumlarının tətbiqində pərakəndəliyin aradan qaldırılmasını, azadolma və güzəştlərlə bağlı müddəaların vahid qanunda cəmləşdirilməsini nəzərdə tutur. Artıq və ya düzgün tutulmamış rüsumların elektron informasiya sistemi vasitəsilə geri qaytarılması, baytarlıq xidmətləri üzrə rüsumların tətbiqinə yenidən baxılması da təklif edilir.

İkinci məsələni Dövlət Vergi Xidmətinin rəisi Orxan Nəzərli təqdim edib. Meşə, Cinayət, Vergi, İnzibati Xətalar məcəllələrində və bir neçə qanunda dəyişikliklər vergi inzibatçılığının təkmilləşdirilməsinə, biznes və investisiya mühitinin yaxşılaşdırılmasına, sahibkarlığın stimullaşdırılmasına, vergitutma bazasının genişləndirilməsinə və fiskal dayanıqlılığa yönəlib. Nəzərli bildirib ki, dəyişikliklər sahibkarlarla aparılan müzakirələr və onların təklifləri nəzərə alınmaqla hazırlanıb.

Xidmətin Vergi siyasəti baş idarəsinin rəisi Nicat İmanov 2027-ci ilin büdcə-vergi siyasəti çərçivəsində təklif olunan dəyişikliklərin istiqamətləri, sahələr üzrə vergi güzəştləri və vergi nəzarətinin gücləndirilməsi barədə təqdimat edib. Hesablama Palatasının şöbə müdiri Nuranə Səfərova və Dövlət Gömrük Komitəsinin baş idarə rəisi Faiq Orucov da çıxış ediblər.

Sonuncu məsələ Əmək, Mülki Prosessual, Ailə, Mülki, Seçki, Rəqabət məcəllələrində və sosial müdafiə, sığorta, təhsil, yaşayış minimumu ilə bağlı qanunlarda dəyişikliklərə aiddir. Dövlət Əmək Müfəttişliyi Xidmətinin rəisi Vəli Quliyev bildirib ki, layihə əmək münasibətlərinin tənzimlənməsinin təkmilləşdirilməsini nəzərdə tutur.